Agih RMK-12 ungkup Sarawak enda senutuk

KUCHING: Agih belanja sepenyampau RM4.47 juta ke diberi ngagai Sarawak nengah Langgur Pemansang Malaysia Lumpar Ke-12 (RMK-12) diasaika pemadu mit dibanding enggau nengeri bukai dikena ngelengkaska takah pemansang.

Sapit Presiden Gerempung Pemikir Dayak Sarawak (DTTAS) Edward Awan madah agih nya semina 6.8 peratus ari penyampau semuya belanja pemansang menua dibaruh RMK-12.

“Agih belanja dibaruh RMK-12 tu nyata nadai mandangka guna Sarawak engagu beratika pemesai bungkur menua, tikas pemansang sereta status nyadi bakih kunsi numbuhka Malaysia.

“Reti nya bisi enda bea ari sukut pemansang wilayah.

“Kitai enda ulih bisi nengeri tinggal laban leka jaku ‘pengelantang sama’ ke seruran disebut patut diasaika semyua rayat Malaysia ukai semina ba Sabah enggau Sarawak,” ku iya madah nengah sebengkah penerang, kemari.

Iya mega madah laban ke nyadi bakih sama numbuhka Malaysia, semua kunsi iya nya asil dibagi bepelasarka pengulih Saawak mantu ngasilka wang menua.

Ku iya, tu nyengkaum penatai pemisi ke diterima Perintah Besai
nengah eksploitasi pengeraja asal nyadi nengeri enggau asil ke diterima ari chukai ba Sarawak.

Edward mega madah guna pemansang Sarawak patut diberi perati laban agi tubah pelilih menua serata enggau patut disikap enggau perengkaguna ke menyana.

Berebak enggau nya, ku iya ubah Kunstitusyen Perintah Besai Sempekat Malaysia (MA63) mega tentu deka ngangkaika guna perati ba sekeda pekara ke udah puntan dipejalaika ngelama tu.

“Diatu udah manggai taun 2021, ukai agi 1957 tauka 1963, Sarawak nengeri pemadu besai ba Malaysia, begunaka perati enggau agih belanja khas dikena ngemansangka nengeri tu sereta mantu perambu nyapai status nengeri maju bepenatai pemisi tinggi manggai taun 2030,” ku iya.

Kenu ku Edward, ekonomi diperati nyadi bidang ke pemadu beguna sereta seruran dikaika enggau MA63.

Nya alai, ku iya perintah patut adil enggau bebasaka kunstitusyen sereta meri agih ke sebela awakka senutuk enggau asil ke datai ari nengeri bekaul.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak