Anang leju mantu orang tusah

PAKAN: Gerempung Nembiak Rebak Baru (PNRB) Pakan Julau bisi nganjung 42 kambut barang pemakai ngagai Rh Budom di Tubai Buah beduduk ari rumah panjai nya diasuh nitih Atur Mindah Betagang Dipekul (PKPD).

Chairman iya, Tedong anak Chakaw madah tuju bantu nya dianjung dikena ngelempungka tating penusah peranak Rh Budom ke diasuh bepekul.

“Aku nguluka bala nembiak bejalaika pengawa pengasih nganjung bantu pemakai dikena nelebaka raban nembiak ditu enggau ulah siru ngagai orang tusah,”ku Tedong.

Berebak enggau nya, Tedong meransang raban nembiak di Pakan anang leju bejalaika pengawa pengasih ke pemaik komuniti.

“Aku mega besampi arapka penyakit tu ulih punas lalu badu agi ngerekai ba menua kitai,”ku iya.

Ba siku nembiak ke ngambi bagi ba program nya, Frank Asun anak Genilun madah diri berasai lantang ati udah enggau mantu orang ke dituntung penusah ketegal PKPD.

“Program tu manah seraya dikena kami raban nembiak ngedut kaul enggau pangan diri. Arapka pengawa tu terus dipejalaika dudi hari dikena nerenakka ulah siru ngagai orang bukai ke tusah,” ku iya.

Ungkup penemu, bisi 14 iku raban nembiak Pakan nyaup ngemujurka pengawa nya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak