Anang nyalam enti bisi kelai dirampit Covid-19

PAKAN: Peranak ba pelilih ditu dipinta anang ngambi mudah sereta anang nyalamka pemedis diri tang patut beperesa ke klinik tauka sepital besemak nyema ngasai diri bisi kelai kena rampit Covid-19.

Tuai Program Gerempung Penyiru Pemansang Pakan (3P), Anita Ujon @Unjong madahka tu berindik ari kes bebadi nyawa bisi ditemu nyadi ba Pakan ketegal kelalu laun diperubat pengudah tudah kena rampit Covid-19.

“Anang takut sereta nangi nganjung diri beperesa ke sepital tauka klinik besemak enggau kita nyema ngasai diri bisi kelai kena rampit Covid-19 baka tabin, batuk tauka nyawa enda masuk makai.

“Kitai enggai, pengilap baka ke udah nyadi ngujungka penusah bebadi nyawa,” ku iya madah ngagai Ruai Suara Sarawak.

Iya mansutka pekara nya pengudah tembu pengawa nyadung bantu barang pemakai ari Gerempung Penyiru Pemansang Pakan (3P) ngagai 11 buah rumah panjai ke diasuh nitih Atur Mindang Betagang (PKPD) ditu, kemari.

Nangkan ke nya, Anita madah taja menua ngalih ngagai rengat ketiga Pelin Penyuman Menua (PPN) tang rayat mesti terus nitihka SOP.

“Taja diatu kitai udah masuk rengat ketiga (fasa 3) PPN ti meri awak ngagai kitai ulih mindah kin kitu nyengkaum ngilah pelilih menua enggau nadai agi kiruh bepintaka permit ari polis tang SOP mesti terus dititih.

“Genap kitai patut ngembuan disiplin pasal pengerai dikena nyeliahka penusah ke enda disadang,” ku iya.

Ngelansa pasal bantu ari Gerempung 3P, Anita madah, bantu nya renggat ketujuh udah disadung sida ngagai rumah panjai ke diasuh PKPD di Pakan.

Bisi 294 tuai bilik udah nerima bantu kenyau program nya dipejalai kena Hari Enam tu tadi.

Entara rumah panjai ke udah dianjung bantu iya nya Rumah Jilap Batu 6 enggau penyampau penerima 33 iku, Rh Akun, Supi (28), Rh Bujang,Ulu Tebok (15), Rumah Anding, Dayu (19), Rumah Kunjan, Buku (12), Rumah Libau, Buku (24), Rumah Enchangi (41) sereta Rumah Mandau (6).

Udah nya, bantu ke sebaka bela bisi dianjung ngagai tiga buah rumah panjai ba Rumah Ko,Balong (24), Rh Imban, Genting Kupi (29) enggau ba Rumah Meringgai,Buku (23), ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak