Asadia ngajar leka main asal nengah chara online

KUCHING: Raban Akedemi Serakup Dayak Iban Sarawak (Asadia) ngena chara digital ngajar leka main asal nyerumba ubah chara baru diatu.

Tuai Asadia Mabong Unggang madah, entara leka main asal ti deka diajar ngagai raban ti masuk kela tu iya nya jaku ansah, jaku melah pinang enggau renung.

“Empas ari chara baru ti dikena jeman diatu, Asadia ngena peluang nya ngatur kelas belajarka leka main asal nengah google meet.

“Kelas tu diatur berengkah bulan Oktober, lalu leka main asal ti dipelajarka kami iya nya jaku ansah, jaku melah pinang enggau renung,” ku iya madah nengah sebengkah penerang nuju Ruai Suara Sarawak, kemari.

Ku iya, kelas nya diajar pengajar Nichol Ragai Lang siku peneleba leka main asal Iban.

“Pengajar Nichol mega kala gawa ba RTM ba bagi seksyen Iban enggau kala gawa ba Kaunsil Tusun Adat.

“Udah tu ila, entara leka main asal bukai ti deka dipelajarka kami iya nya pantun Iban leka main anak mit, ramban enggau leka main ti bukai,” ku iya.

Iya madahka, kelas online tu diatur endang deka ngangkatka main asal ngagai bala ti diau jauh ngachir ba Kuching enggau Samarahan.

“Nengah chara online Asadia ulih nguna orang ke landik ba leka main ngajar raban kami ari rumah aja.

“Sida ti ninga mega ulih belajar leka main ari rumah sida empu,” ku iya.

Ku iya, kelas nya diatur berengkah pukul 5.00 lemai nyentuk pukul 8.00 malam.

Iya mega madahka ba renggat keterubah bisi 14 iku raban Asadia nyereta kelas ti diatur ensana.

Suara Sarawak