Atur Undi18 ulih dikena lepas 31 Disember 2021

KUALA LUMPUR: Pengundi biak (baruh umur 18 taun) deka dikemendar ngundi maya Pengawa Bepilih Nengeri (PRN) Sarawak enti sema pengawa bepilih nya diatur pengudah 31 Disember tu, ku Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar.

Ku iya, Undi 18 mesti dipejalai baka ti diperintah Kort Tinggi Kuching sebedau tu.

Iya mansutka jaku nya lebuh nyaut tanya Mohamed Hanipa Maidin (PH-Sepang) ti minta jamin perintah deka bejalaika Undi 18 lebuh nyimpul Rang Undang-Undang Ordinan Peguam Bela (Sabah) (Pindaan) 2021 ba Aum Parlimen.

“Kebendar, tanya ‘Yang Berhormat’ nadai kaul enggau rang undang-undang tu… enti PRN (Sarawak) diatur sebedau 31 Disember, pekara tu agi bedau ngena atur ke baru (Undi 18) tang kitai mesti nitihka atur ditetapka kort enti PRN diatur pengudah Januari 2022,” ku Wan Junaidi.

Kena 3 September tu tadi, Kort Tinggi Kuching merintahka Komiti Besai Pengawa Bepilih (SPR) enggau perintah bejalaika Undi 18 maya 31 Disember tu.

Nangkan nya, Wan Junaidi lebuh bejuraika Rang Undang-Undang Ordinan Peguam Bela (Sabah) (Pindaan) 2021 kedua kali madah, pekara tu dikena negapka sektor undang-undang enggau servis luyar bela di Sabah.

“Pengawa ngaga Rang Undang-Undang Ordinan Peguam Bela (Sabah) (Pindaan) 2021 tu udah ngaul raban bekaul baka Opis Sekretari Perintah Sabah enggau Opis Luyar Menua nentuka pekara tu nitihka utai diguna,” ku iya.

Udah nya, Aum Parlimen ngemendarka rang undang-undang nya enggau nadai ubah nitihka majoriti.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak