Ayanka penyiru nengah pengawa meri darah

KUCHING: Mensia mayuh diperansang terus meri darah dikena nyapai juluk ati Malaysia Sebilik ti betatika rayat enggau ngayanka penyiru ngagai orang bukai.

Direktor Opis Pemadah (JaPen) Nengeri Sarawak Swady Guliling madahka JaPen ngatur kerejasama enggau Opis Menteri Pengerai (KKM) Sarawak ngatur program meri darah dikena mantu Bank Darah Sepital Besai Sarawak (HUS) ngulihka bekal darah.

“Dalam reti Malaysia Sebilik kitai andalka mensia mayuh ti betatika pengidup orang bukai ulih datai meri darah sida ungkup guna sepital.

“Semua rayat di menua tu patut ngembuan penyedar dalam ngambi bagi nyaga pengelikun menua baka mantu meri darah enggau ke bukai,” ku iya maya bejadika Program Sempakat @ Komuniti (Kimpin Meri Darah) ba Supermakit Mydin ditu, kemari.

Ku iya, program ti diatur sehari nya merambu 100 iku datai meri darah.

“Naka diatu (pagi kemari) urung 30 iku udah meri darah tang kami andalka mayuh agi orang datai meri darah udah tu lagi.

“Engka lebuh mensia mayuh datai meli barang ngagai Mydin sida ulih ngambi awak enda lama meri darah ditu.

“Aku meri terima kasih ngagai semua ti bekaul ngatur program tu enggau lanchar,” ku iya.

Berebak enggau nya, Tuai Servis Transfusyen enggau Bank Darah Negari Sarawak Dr Mohammad Masrin Md Zahrin madahka sida nitihka Atur Pengawa Standard (SOP) ti terit lebuh bejalaika kimpin nya.

“Orang ti datai kitu endang dipatau dulu tauka betemu enggau lutur sebedau diaku ulih nyadi pemeri darah.

“Sejarah pejalai sida dalam timpuh 14 hari enggau bekaul pesakit Covid-19 mega dipansik dulu.

“Katil endur sida meri darah dituchi sebedau enggau sepengudah endur meri darah, nya alai aku ngarapka sida ti deka meri darah anang irau,” ku iya.

Tandu Mohd Masrin, sida endang meransang rayat ti deka meri darah endang udah genap divaksin tang sida mega tetap nerima orang ti bedau divaksin meri darah laban pemadu beguna dikena ngidupka nyawa mensia.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak