Bajet 2022 agi mimit

SIBURAN: Menteri Muda Betanam Betupi, Tanah Adat enggau Pemansang Kandang Menua Datuk Roland Sagah Wee Inn agi bedau tepantup ati enggau penyampau agih RM4.6 billion ungkup Sarawak dalam Bajet 2022.

Ku iya, penyampau agih tu agi mimit enti dibanding enggau pengulih Perintah Besai ari Sarawak.

“Aku bedau meda semua Bajet 2022 tu, tang aku bedau tepantup ati meda bajet ungkup Sarawak ti semina nerima RM4.6 billion aja.

“Penyampau tu agi mimit enti dibanding enggau penyampau pengulih Perintah Besai ari menua kitai,” ku iya.

Iya bejaku munyi nya lebuh ditanya pemberita pengudah Nyuaka Voucher Bantu Meli Pekayan Sekula ari Yayasan Sarawak di Balai Mensia Mayuh Kampung Beratok ditu, kemari.

Iya nangkan ke nya, ngarapka Perintah Besai ulih meri perati ngagai projek ti udah dikemendarka ba baruh Langgur Pemansang Lumpar Ke-11 (RMK11) awakka ulih ditembuka dulu.

“Nya alai, aku ngarapka perintah baru tu tegap agi enggau ulih bejalaika projek ti dikemendarka dulu,” ku iya.

Dulu ari nya, Tengku Datuk Seri Zafrul Tengku Abdul Aziz lebuh mansutka Bajet 2022 madahka penyampau RM4.6 billion diberi ngagai Sarawak ungkup bejalaika projek infrastruktur bekal ai, kuasa karan enggau jalai alun, pekara pelajar sereta pekara pengerai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak