Bajet 2022 mungkur semua pekara

KUCHING: Jurai Bajet 2022 nyata mandangka pengawa perintah mungkur semua dalam mutarka penanggul ekonomi ketegal pandemik Covid-19.

Chairman Gerempung Pemansang Reta Enggau Pengawa Berumah Sarawak (SHEDA) Pampang Kuching, Datuk Sim Kiang Chiok madah, tu seriris enggau atur ke dipejalaika perintah dalam nangkup peminta sektor dagang.

“Sekeda inisiatif nya udah dipejalaika perintah nengah bajet tu nyengkaum bantu wang ngagai ruang bilik raban B40 enggau M40 sekumbang timpuh nyumanka menua.

“Tu ditangka enggau bantu RM500 ngagai raban apai indai tunggal ke ngembuan penatai pemisi kurang ari RM5,000 sebulan enggau RM300 ungkup ruang bilik ke bisi ngibun orang lunggar umur,” ku iya.

Iya amdah munyi nya lebih nimbal pasal jurai Bajet 2022, ke baru dibantaika ensana.

Bantu Malaysia sebilik tu meri pemaik ngagai 9.6 juta iku orang nengah agih RM8.2 bilion.

Kelimpah nya, atur perintah ti mantuka Bantu Malaysia Sebilik (BKM) iya nya meri RM2,000 ngagai ruang bilik ke bisi tiga anak enggau penatai pemisi kurang ari RM2,500 sebulan,  nya mega diasaika sebengkah atur ti ngemeratka pengelantang rayat.

Tu ditangkan enggau iniatif ngurangka penyampau orang nadai kereja ari 4.6 peratus ngagai 4 peratus nengah chara nulung rayat ti putus pengawa nengah chara meri jamin nyendiaka kereja ngagai sida.

Kenu ku iua, nengah atur nyendiaka skim pengawa puang ke nyelinting 600,000 iku pengereja pengawa , nya disadang ulih ngirangka penyampau orang nadai kereja ba menua tu ti ngerikodka penyampau 4.6 peratus naka bulan Ogos tu tadi.

Ba baruh skim tu mega, perintah deka meri subsidi 20 peratus ari gaji ungkup enam bulan keterubah enggau 30 peratus ungkup enam bulan nangkan ke nya.

“Taja pia, skim nya ditatak ngagai gaji kurang ari RM1,500 aja,” ku iya.

Nerang silik pasal inisiatif ungkup raban Pedagang Mit enggau Jelan Pemesai (PKS), iya madah diri nyukung iniatif nya ti ngagihka belanja sepenyampauy RM40 bilion ngagai PKS dikena meri jali bank enggau mantu ari sukut chengkeram PKS ti deka ngepunka dagang diri.

“Taja enda disebut atur silik pasal jali nya, tang kitai ngarapka atur ke ditentur ngambi mayuh serikat ke napi pengerugi ulih dibantu,” ku tandu Sim.

Udah nya, iya ngarapka Bajet 2022 tu ulih dikena ngemansangka ekonomi menua ti balat tejanggal ketegal pandemik.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak