Belanja diberi ukai semaya bula PRN

BAU: Semaya pasal agih belanja ti diberi ungkup pemansang ari Perintah Sarawak ukai semaya bula nyerumba Pengawa Bepilih Besai Nengeri (PRN), tang endang udah bisi agih belanja dikemendarka.

Sapit Kepala Menteri ti mega Sapit Presiden Pesaka Bumiputera Bersatu (PBB) Datuk Amar Douglas Uggah Embas madahka tuju besai perintah endang deka nulung rayat.

“Ba baruh Gempung Parti Sarawak (GPS) ti diiring Kepala Menteri Datuk Patinggi Abang Johari Tun Openg, iya udah madahka sigi endang amai deka mantu rayat menua pesisir.

“Siti ari pekara ti balat dikemerat lebuh mantu rayat menua pesisir iya nya nengah pengawa betanam betupi laban menua kitai bisi tanah ti luas,” ku iya.

Uggah bejaku munyi nya lebuh Bejadika Program AgriCop enggau Projek Penupi Daging Chapi di Kampung Merembeh ditu, kemari.

Ku iya, bekau ari nya, perintah meri mayuh bantu ngagai rayat baka baja, perengka dikena bekebun enggau ke bukai.

“Tuju kitai endang deka mantu ngambika rayat menua pesisir enda tinggal pemansang.

“Bisi pan kitai tanah, tang enti tanah nya nadai dikemansangka pan nadai meh tanah nya ulih meri asil,” ku iya.

Iya mega madahka, ketegal keran deka ngemansangka menua tu Abang Johari udah merambu pelin di baruh Strategi Pemansang Pasca Covid-19 2030 ungkup pengelantang rayat.

“Tu ukai semaya ngapa baka sida ke udah dulu besemaya mayuh pekara tang nadai dikeamat.

“Sekeda sida madah, sehari tu menang pagi ila rega minyak nurun, tang lebuh sida menang rega minyak mengkang tinggi,” ku iya.

Iya mega madahka, menua Sarawak nyadi entara menua ti pemadu tegap ba baruh pegai GPS.

“Perintah Besai tiga kali udah beganti Menteri Besai, diatu Melaka udah ngatur PRN enggau Sabah udah bekalih perintah.

“Tang kitai di Sarawak meruan tegap laban perintah nerima sukung ari rayat,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak