Cheremin mata chap DEPHA bekualiti sereta bemacham fesyen

Aldrine Phillie tauka lebih dikelala enggau nama Depha Masterpiece diatu benung chakah ngelakuka siti produk cheremin mata ti ngembuan chap nama DEPHA.

Penanyi raban Band Tebilang Masterpiece tu madahka cheremin mata Depha tu udah berengkah dijual kenyau pun bulan September tu tadi nengah kompeni DJR Rocklab Inc ti baru ditumbuhka apin lama.

“Baka dagang bukai, aku mega ngarapka produk cheremin mata chap DEPHA tu ulih terus dikelala tauka nerima sambut ari penguna sebaka enggau chap cheremin mata ke bukai.

“Cheremin mata tu ngembuan mayuh macham fesyen nitihka ubah pemansang dunya dagang cheremin mata enggau peminta ari penguna.

“Pengandal besai iya nya ngarapka cheremin mata chap DEPHA tu ulih nyadi siti chap ti tebilang.

DEPHA MASTERPIECE

“Enti enda ulih rembus ke menua luar, laku ba Sarawak aja pan udah pama.

“Pia mega, aku ngarapka tu ulih siti agi kelai sukat tauka singkang pemujur artis Iban ba dunya dagang kelimpah ri ngemeranka pengawa pemerindang.

“Naka tu, timbal ari peminat sereta penguna chukup manah lalu bisi sekeda nya meli sampai meniga iti sekali,” ku iya madah ngagai Ruai Suara Sarawak.

JULUK BEDAGANG

Kebendar, aku udah lama ngembuan juluk deka muka dagang dalam lima taun ke udah tang laban ke agi berati ke makit enggau peminta ari mensia mayuh seraya ba jam ti sama ngambi awak belajarka ni bagi pekara ti patut dulu diadu ba dunya dagang.

“Suah tejanggal mega laban kiruh ngatur bemacham pengawa bukai lebih agi bekaul enggau dunya pemerindang laban nya mega siti ari pengawa besai aku.

“Pengujung iya, ari pemayuh buah penemu diterima ari bala bakih ti sama dalam DJR Rocklab Inc dia dih kami lalu mutus ati milih bedagangka produk cheremin mata.

“Kiraka nyelai agi ari dagang artis bukai kelimpah aku empu endang minat sereta rindu bekenaka cheremin mata enggau enda ngira maya sekalika maya belagu tauka enda,” ku iya.

LAKU TAJA AGI BARU

MAYUH MACHAM….Cheremin mata jenama Depha chukup mana sereta nyamai dikena sebarang maya kelimpah ngembuan pengelebih iya empu.

Laban produk tu agi baru dipenyadi kena ka 16 September tu tadi, nya alai naka tu kami agi meri awak sereta peluang ngagai bala peminat meli cheremin mata tu nengah chara online ba ruai Facebook DJR Rocklab Inc empu.

“Ba laman Facebook nya sida ulih berandau betanya enggau ejen ba selampur Sarawak baka di Kuching, Sibu, Bintulu, enggau Miri.

“Kami mega bisi perambu deka muka siti laman web khas dikena ngelakuka produk chap DEPHA ke bukai kelimpah ari cheremin mata.

“Perambu bukai iya nya deka engkah produk tu ba kedai cheremin mata tang tu agi ba tikas perambu,” ku iya ti benung ba Taiwan.

Kebendar, Kami enda ngadang timbal ari penguna chukup manah ke alai semua stok keterubah lengis dijual dalam timpuh seminggu pengudah dilanchar.

“Renggat keterubah udah abis dijual dalam timpuh seminggu pengudah dilancharka lalu bisi mega dibeli peminat ari menua bukai baka ari Brunei Darul Salam (Kuala Belait) enggau di Semenanjung.

“Apin lama kami mujur ngatur ‘new shipment’ enggau penyampau ditambah agi ari sebedau tu dikena nyangkung ejen baru di Johor tauka semenanjung,” ku iya seraya madahka stok baru deka datai dalam bulan Oktober tu.

KUALITI PRODUK

MAYUH MACHAM….Cheremin mata jenama Depha chukup mana sereta nyamai dikena sebarang maya kelimpah ngembuan pengelebih iya empu.

Tu asai ku chermin mata chap ari menua tu empu keterubah keterubah iya dijual ba makit kitai (Sarawak) sama kualiti sama baka produk ari menua luar.

“Naka tu kami nerima timbal penemu ke chukup manah ari penguna bepun ari chara mungkus, nyentuk ke pendiau cheremin mata nya empu.

“Kelimpah ari ngembuan kualiti bukai baka Frame tauka Temple iya ngena Polycarbonate (PC), Lens iya mega ngena Polarized TAC lalu ulih nyaga mata ari silau maya panchar mata panas (UV protect) tan laban ai masin sereta ‘Microfiber Pouch’.

“Udah nya, rega iya numbas mega dijual enggau rega ulih ditangkup mensia mayuh,” ku iya,” seraya madahka bisi tiga iti versyen dijual naka tu iya nya Prodigy Red Inferno, Prodigy Ice enggau Prodigy Volcano.

“Ngarika kompeni DJR RockLab Inc, aku meri besai terima kasih nuju semua pemeli ti udah meli kelai sukung ngagai produk cheremin mata DEPHA.

“Sapa deka ngujika produk tu, anang sanggu ngudar aja ba laman tauka page Facebook DJR RockLab Inc sereta bisi ngundan peneran ke lebih silik.

“Udah meli, anang enda ingat bantaika gambar kita ngena cheremin mata DEPHA sereta beri ‘hashtag’ nama DJRrocklab,” ku iya.

DIJUAL BA BRUNEI…Produk cheremin mata Depha bisi dijual di Brunei.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak