Cherita Unggang Lebor Menua enggau Batu Nibong

Nama menua Muara Tebas kelia datai ari leka jaku Iban Nanga Tebas sebedau ditukar ngagai Muara Tebas.

Diatu Muara Tebas bepalan ba nanga sungai Sarawak kena pegai sitak Kunsil Nengeri (Dun) Demak Laut ngembuan penyauh urung 23 kilometer ari Mengeri Besai Kuching.

Kelia Muara Tebas tu palan penyangkai raban pelayar ti deka tama ke menua Kuching nengah jalai sungai. Pia mega sebedau mansutka diri ari nanga sungai Sarawak deka ngelawa menua bukai sida deka ngetu dulu ba Muara Tebas beratika gaya hari adap ke tasik.

Kenu ku cherita tuai ditampung Facebook Ibanology madahka menua Nanga Tebas kebendar bulih nama ari jerita Raja Berani bansa Iban siku benama Unggang Lebor Menua ke mega tuai ke megai menua Saribas, Skrang enggau pelilih kandang menua Iban jauh sebedau penatai Rajah Brooke ke menua Sarawak.

Unggang Lebor Menua tu kala bemimpi betemu enggau bunsu Kumang enggau Lulong ke baru pulai mandi ba tuchung Bukit Santubong.

Penulis kala ngerembuska pejalai ngagai Tepikong Chin San Yen di Muara Tebas kena bulan Februari 2019.

Udah nya, bunsu Kumang meri batu pengunsut nyadi ke pengaruh dikena nulung Unggang nyadi tuai kayau megai menua.

Berebak ari nya, Unggang Lebor Menua lalu ngeban perau kayau ke chukup besai dikumbai Bangkong dikena belayar ngilah Tasik China Selatan.

Kelimpah ari ngayau Unggang mega ngempu tanggungpengawa nyaga menua ari dikachau orang luar ti deka ngeregau menua Sarawak.

Nampung cherita tuai, empa pengering Raja Berani Unggang Lebor Menua ,lebuh iya ngayau bala lanun ari Pulau Filipina ke datai diau mendam ba nebing tasik nanga sungai Sarawak dia deh menua nya abis anchur lebur nyau baka ke ditebas, semua pun kayu tumbang magang digasakka Unggang.

Bekau ari jerita nya menua nya lalu diberi nama NangaTebas (Muara Tebas) bepun ari jerita Raja Berani bansa Iban kelia.

Nama Unggang mega terus beberita nyentuk ka iya diberi ensumbar Unggang Lebor Menua ka mai reti ‘Penghancur Dunia’.

Nya meh siti jerita tuai ari bansa asal Dayak Iban kelia senentang ketuai Iban tauka Raja Iban ke chukup beberita jelai rita dikenangi bala pelayar enggau pedagang menua luar jeman kurun ke 17 ke deka datai ngelawa Pulau Borneo maya nya.

Siti agi sejarah bukai ti bekaul enggau menua Muara Tebas mega iya nya cherita pasal Batu Nibong. Diatu Batu Nibong agi mengkang bisi dipeda ba menua nya chechukak baka tunggul dipagar ngena dawai bepalan berimbai enggau siti tepikung China ke pemadu besai diberi nama Chin San Yen beumur urung 200 taun.

Pendam Batu Nibong di Kpg Muara Tebas.- Facebook Melie Al Haj Fan Pages

Ngelansa pasal cherita Batu Nibong kenu ku siku penguna Facebook Melie Al Haj Fan Pages ke mega peranak Kpg Muara Tebas madah lebuh umur iya manggai 8 taun iya enggau aki iya ke benama Haji Rejili bin Lana begulai enggau bala sida semenua ke bukai bisi berandau ba rumah sida empu urung taun 1974.

Dia Pak Haji Basir bin Nor (maya nya taun 2020) beumur 88 taun ngenang pasal cherita Batu Nibong tauka dikumbai batu pendam.

Pendam ke dikelai enggau Batu Nibong tu kelia kebendar dipenggi siku indu ke sangkai ba tebing Nanga Tebas seraya nganti hari badu ujan enggau laut pangka pasang diumba munyi guntur enggau kilat.

Laban ke benung nganti gaya hari ujan teduh dia indu ke benung sakit tu tadi parai lalu terus dipandi enggau ditumbakka ba tisi tanah pendam ke apin mayuh maya nya.

Maya nya mega, tang sebarang utai ulih nyadi kelai pendam orang ke udah mati. Nyadi enggi indu tu tadi dikelai enggau sebatang kayu nibung beduri ke udah dikupak kulit.

Dipandakka cherita, nyau kelama-lama dia nibung nya tadi bebali nyadi batu.

Nitihka cherita Pak Haji Basir ke sempat ngupas pendam Batu Nibong nya dia agi bisi bekau kulit nibong tang diatu pendiau batu nya nyau majak pupur tang agi ulih dipeda sereta berimbai enggau rumah ini Haji Rejili bin Lan.

Mayuh mega kisah bukai didinga iya maya nya ku iya, nyengkaum kisah seraban bansa Dayak nyimpung batu nibung nya enggau duku ilang ke chukup tajam sereta sempiar ke ulih belah nya sida nya terus dibai pulai. Taja pia, ku iya kira penyauh urung 200 meter udah bekejang dia perau ke ditepan sida nya tadi karam lalu ngujungka semua sida bebadi nyawa.

Nyadi baka nya mih sekeda lansa cherita ti bekaul enggau menua Muara Tebas. Nyangka agi mayuh kisah ke ditemu mensia mayuh bekaul enggau Muara Tebas arapka kitai bela ngerembai tauka nampung kisah nya ngambika terus ditemu rebak baru. Penulis mega kala ngerembuska pejalai diri ngagai Muara Tebas lalu sempat niki ngagai atas Tepikong Chin San Yen taun 2019. Taja pia maya nya penulis apin nemu bisi pendam Batu Nibong ba semak kaki tepikong nya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak