CNS nyukung atur netapka orang gawa perintah mesti divaksin

KUCHING: Serakup Pengereja Perintah Sarawak (CNS) nerima atur Opis Servis Perintah (JPA) ke netapka pengereja perintah enda tau enda nerima vaksin Covid-19.

Chairman iya, Omar Bahrein Unin madah, pekara nya ungkup pemaik semua nengah inisiatif dipejalaika perintah nagang pengerekai igi penyakit nya.

“Kami ngarapka sebarang pengawa ngagai pengereja perintah ke bedau rejister nerima vaksin ulih diperunding nitihka pematut.

“Tu nyengkaum ngelala penanggul ke nyadi baka nama kebuah sida enggai nerima vaksin enggau kebuah bukai,” terang iya, ditu kemari.

Nambahka nya, iya madahka sida nerima sebarang atur baka dipadahka JPA laban tiap pengereja perintah endang nitihka atur lebuh gawa dalam perintah.

“Taja pia, CNS ngarapka atur nya anang mih nyau dibuai kereja tauka meri ukum berat laban nya pekara baru dalam perintah lalu ukai penyalah ke berat,” terang iya.

Iya mega madah, sida meransang pengereja perintah nerima vaksin taja Perintah Sarawak udah madahka nya ukai dipejal.

“Pengereja perintah patut nerima vaksin ungkup pengelikun sereta pengerai diri, ruang bilik enggau komuniti lebuh gawaka rayat,” ku iya.

Suara Sarawak