Fama, PPNS diperansang bekerejasama ngerembai makit produk ke menua luar

KUCHING: Kaunsil Makit Betanam Betupi Perintah Besai (Fama) diperansang nempa kerejasama enggau Gerempung Orang Bumai Nengeri Sarawak (PPNS) dikena nulung ngerembaika makit asil betanam betupi ngagai menua luar.

Kenu ku Sapit Kepala Menteri Datuk Amar Douglas Uggah Embas, iya andal Fama ngembuan pampang ba serata menua ulih mantu PPNS nyungkak agi daya makit produk-produk nengeri tu nyengkaum nempa kaul dagang ke lebih besai.

“Diatu juluk besai kitai iya nya ngurangka penyampau produk import seriris enggau juluk Sarawak nyadi pengeksport beresi produk enggau asil betanam betupi manggai taun 2030.

“Nya alai, kitai patut bejalaika semua rantai penatai asil sekalika ba tikas pengeluar, proses enggau makit.

“Ditu kitai meri tanggungpengawa ngagai PPNS ngambika ngelanggur mekanisma enggau sistem, aku andal Fama ulih nulung PPNS ngerembaika makit dagang ukai semina ba Sarawak, enggau Malaysia, tang mega ngagai menua luar,” ku iya.

Iya ke mega Menteri Betanam Betupi Moden, Tanah Adat enggau Pemansang Wilayah madah munyi nya ba aum pemberita pengudah bejadika Program Jual Terus Ari Kebun (JTDL) enggau My Rakyat di Canaan Square ditu, kemari.

Kenu ku Uggah, naka tu Sarawak bisi ngeksport sekeda produk betanam betupi ke sekeda menua nyengkaum Singapura.

“Pelasar baka tu mih ti deka digaga iya nya ngerembaika produk Sarawak ngagai menua luar tang produk nya mesti kompetitif enggau ulih besemekih enggau produk menua luar.

“Nya alai, perintah nengeri deka terus berundingka chara baka ni deka ngelakuka produk pertanian dikena nyungkak penatai pemisi orang bumai ba Sarawak,” ku iya.

Kenu ku iya mega, taun tu Kepala Menteri udah ngemendarka agih RM10 juta ngagai PPNS dikena nulung raban orang bumai negapka sistem makit awak ke ulih nyingkang ngagai makit ke lebih moden enggau rembus ke menua luar.

Suara Sarawak