Gaga promosyen produk kraf nengah chara digital

KUCHING: Produk kraf jari ulih nyadi koleksi ke chukup berega enti dijual enggau chara ti betul nyentuk rembus ngagai makit entarabansa.

Menteri Komunikasyen enggau Multimedia Tan Sri Datuk Seri Panglima TPr Annuar Musa madah, produk kraf jari ulih nyadi produk berega enggau eksklusif enti dijual enggau chara ke betul.

“Aku ngarapka Ejensi Pemansang Ekonomi Seni Budaya (Cendana) ulih ngemansangka chara baru ari sukut digital dikena ngelakuka produk kraf jari tu.

“Chara baru ke dikemansang diatu nya pelasar digital nentuka produk kraf jari ulih rembus ngagai makit entarabansa.

“Tabi puji nuju Cendana ke udah bejalaika bemacham inisiatif taja bepalan di Kuala Lumpur.

“Kebuah pia laban sida mujur ngangkatka pengeluar produk kraf jari ke jauh nyengkaum ba menua ulu Sarawak,” terang iya.

Annuar mansutka jaku nya pengudah ngabas Tanoti House diatur Cendana, pagi kemari.

Nambahka nya, Annuar ngarapka Cendana ulih nyaup enggau ngembing pengeluar produk kraf jari baka meri bantu nengah bemacham geran disediaka opis menteri.

Dulu ari nya, Annuar udah mendingka taklimat dikenatai Direktor Tanoti House, Jacqueline Fong pasal penumbuh Tanoti House.

Sama nyempulang pejalai Annuar iya nya Tuai Sekretari Opis Menteri Komunikasyen enggau Multimedia (KKMM), Dato’ Sri Mohammad Mentek.

NEMUAI… Annuar udah ngatur pejalai nemuai ngagai Tanoti House, Jalai Tabuan, pagi kemari. – GAMBAR Opis Pemadah

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak