GPS lenyau siku tuai ti kering

SPAOH: Gempung Parti Sarawak (GPS) lenyau siku tuai ke kering, Tan Sri Dr James Jemut Masing seruran ngemeratka rayat dalam pejalai politik iya.

Sapit Kepala Menteri Datuk Amar Douglas Uggah Embas madah, Presiden Parti Rayat Sarawak (PRS) ke mega Sapit Kepala Menteri nya endang siku tuai ke panjai runding enggau maju ke mua.

“Niang seruran ngemeratka rayat ba pejalai pengawa politik iya.

“Nya alai, lebih agi raban bansa Dayak udah lenyau siku tuai ke seruran bebendar ngemansangka sida ba semua sukut,” ku iya lebih meri timbal bekaul enggau pemidang bakih iya niang Tan Sri Masing tadi.

Ku iya, pemerani niang bejaku ngenataika sebana rayat menua pesisir endang berupai.

“Siku anak rumah panjai ari menua ulu Baleh ke bisi pelajar, pengujung iya mujur nyadi ketuai politik nengeri ngembuan juluk ke chukup tinggi, ransing enggau bebendar gawa ke rayat menua pesisir enggau semua rayat Sarawak,” ku Uggah.

Menteri Betanam Betupi Moden, Tanah Adat enggau Pemansang Wilayah ngenataika penyinu ati ngagai sida niang sebilik.

Suara Sarawak