GPS Saribas udah sedia napi PRN nitih SOP

KUCHING: Tim Gempung Parti Sarawak (GPS) di Saribas sedia napi Pengawa Bepilih Nengeri Ke-12 (PRN-12) sebarang maya taja ngena Atur Pengawa Standard (SOP) pengawa bepilih baru.

Tuai PBB Pampang Saribas, Mohammad Razi Sitam nyemetak madah, raban parti ba renggat baru dipinta sedia enggau sebarang chara ke engkeman ngatur pengawa bepilih dikena nagang pengerekai Covid-19.

“Pekara ke nyadi diatu nya PRN-12 deka diatur enggau chara baru.

“Nya kebuah kitai deka nitihka SOP ditetapka Komiti Besai Pengawa Bepilih (SPR) lalu kitai andal ulih napi PRN-12 enggau manah.

“Tu nyengkaum bekimpin ngena pelasar teknologi enggau media rama,” terang iya.

Adun Saribas mansutka jaku nya pengudah ngulu bengkel ke sama digulu Mandal Chairman Parti PBB, Datuk Julaihi Narawi, ensanus.

Iya meri ngandalka rayat ba Saribas tuai runding enggau pintar beratika inisiatif dipejalai Perintah Sarawak ngelama tu.

“Pemansang dibai Perintah GPS ngelama tu chukup nyata enggau enda ulih dikeenggai.

“Enti mayuh agi sukung, mayuh agi pemansang ulih diasaika semua kitai,” terang iya.

Razi mai bala tuai pampang enggau renggat baruh gawa nyadi siti tim sereta meransang tuai menua pesisir.

“Tuai menua pesisir ti sepenemu beguna amat ngambi ulih bejalaika tanggung pengawa nentuka polisi enggau tunga kuing agenda pemansang Sarawak kelebih agi ungkup menua pesisir.

“Enti ketuai menua pesisir lenbau, sada nyawa kitai enda didinga lalu pekara tu deka pulaika pengerugi ngagai sitak menua pesisir nya empu,” terang Razi

Suara Sarawak