Gua Niah dikelengkas diadu nyadi palan pesaka dunya

BELAGA: Perintah Besai udah mantu ngelengkaska peminta Perintah Sarawak ngambi ngerintaika Taman Negara Gua Niah nyadi palan pesaka dunya nengah Serakup Pelajar, Saintifik enggau Main Asal Gempung Bansa (Unesco).

Menteri Dagang Temuai, Seni enggau Main Asal (MOTAC) Datuk Seri Nancy Shukri madah, peminta nya diatu benung dipejalai sereta nadai penanggul.

“Ari sukut Perintah Besai, kami udah mantu ngelengkaska palan tu diaku nyadi palan pekasa dunya Unesco.

“Aku ngarapka pengawa mujur sereta enda pedis endur Sarawak bulih nya,” ku iya ba aum pemberita nyerumba pejalai gawa ngagai Produk EkoDagang Temuai ba Lusong Laku Belaga, ensana.

Perambu nya laban berundingka asil pansik raban arkeologi ari University of New South Wales betuaika Profesor Madya Dr Darren Curnoe taun 2017 tetemuka Gua Niah kala diuan mensia urung 65,000 taun ke udah.

Kelimpah nyadi penyungkak ngagai pemansang industri ekodagang temuai ba nengeri tu. Diatu, semina Taman Negara Mulu udah diaku nyadi taba pesaka dunya Unesci ba taun 2000.

Gua Niah ke ngembuan pemesai 12 hektar enggau mega nyadi sebengkah lubang batu ke pemadu tuai ba dunya, mega nyadi lubang batu ke pemadu besai ba Malaysia kelimpah ngundan mayuh sejarah.

Maya Oktober 2010, Kepala Menteri Pehin Sri Abdul Taib Mahmud maya nya merambu ngagai Opis Menteri Dagang Temuai enggau Pengeraja Asal sereta Opis Muzium bela besaup ngaduka Gua Niah diaku nyadi Palan Pesaka Dunya sebaka enggau Taman Negara Gunung Mulu.

Ba taun 2019, sekali agi perintah nengeri nganjung peminta ke sama ngambika Gua Batu Kapur ke pemadu besai ba dunya enggau bepalan urung 90 kilometer tauka 1 setengah jam ari Miri. Gua nya mandangka bukti pengidup mensia pemadu tumu ba pulau Borneo.

Kena 1958, sepasang pakar arkeologi, Tom enggau Barbara Harrison tetemuka kerubung pala bansa homo sapien dalam gua nya. Pemansik ari Australia nya amdah bepelasarka pansik sida, gua nya nyangka ulih nyadi palan endur mensia diau kenyau 65,000 taun ke udah.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak