Isu dividen Felcra deka diputar

KOTA SAMARAHAN: Felcra Berhad (Felcra) komited deka mutarka isu bekaul enggau penyampau dividen raban penyereta kelebih agi mungkur peranak genturung pendiau.

Menteri Pemansang Menua Pesisir Datuk Seri Mahdzir Khalid madahka, dalam timpuh dua taun ke udah rega sawit baruh enggau rayat mega benung napi pengerekai Covid-19.

“Enti nadai penanggul taun tu enggau taun nangkan ke tu engka gaya pandemik tu deka manah agi lalu rega sawit mega deka diau ba tikas ti tinggi.

“Nya alai, engka dividen ti diberi deka lebih ngemantupka ati bala kaban Felcra,” ku iya.

Iya bejaku munyi nya ba aum media pengudah Program Betemu Bala Pesereta enggau Menteri Pemansang Menua Pesisir Datuk Seri Mahdzir Khalid di Balai Mensia Mayuh Kampung Empila, ditu kemari.

Ngelansa sentang perambu nentuka tikas dividen sawit terus ditambahka, Mahdzir madahka iya pechaya rega sawit ti tinggi enggau bayar utang ti mimit raban Felcra deka nerima pulai dalam chara dividen.

“Aku empu pechaya rega sawit ti tinggi sereta bayar utang ti mimit ari Felcra sida deka bulih untung dalam dividen.

“Nyema iya (pesereta) bisi utang enggau Felcra tang bisi nanam sawit dalam timpuh lima taun…penyampau nya deka dibayar baru.

“Ambika chunto, enti penatai pemisi sida RM5,000 enggau bayar utang RM2,000, nya reti iya sida deka bulih RM3,000.

“Enti RM5,000 nya ditulak RM500, sida bisi RM4,500 lalu itung dividen sida nyadi tinggi,” ku iya.

Iya nangkan ke nya madahka dividen ti diberi maua tu endang puku rata RM500 ngagai RM7,000.

“Palan tu (Kota Samarahan) endang palan nanam sawit enggau kira-kira 2,500 iku pesereta Felcra,” ku iya.

Berebak enggau nya Kaban Parlimen Kota Samarahan Rubiah Wang lebuh bejaku madahka iya irau bekaul isu dividen ngagai raban Felcra dibaruh sitak iya.

Ku iya, penyampau dividen ungkup dua ngagai tiga taun ke udah lalu agi mimit sereta ngasaka ati.

“Nya engka ketegal ekonomi sereta gaya dandang ti mayuh berubah setaun dua taun tu.

“Taja pia, Direktor Felcra udah madahka ngagai aku enggau peranak ditu awak nambahka kualiti asil enggau pengeluar sawit ari Kota Samarahan,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak