Jurai Ubah RUU MA63 ditangguh ukai penanggul besai

KUCHING: Pengawa nangguhka pengawa bejuraika ubah Rang Undang-Undang Sempekat Malaysia 1963 (MA63) ukai ketegal penanggul besai, ku Kepala Datuk Patinggi Abang Johari Tun Openg.

Abang Johari mega udah dipadahka Menteri ba Opis Menteri Besai (Parlimen enggau Undang-undang) Datuk Seri Wan Junaidi Tuanku Jaafar pasal nya semina ngaul sekeda pekara Federasyen dalam Artikel 160 Perlembagaan Persekutuan.

“Sida semina deka ngenukuka beberapa pekara… ukai penanggul besai semina pekara bekaul meretika undang-undang enggau minta Luyar Menua nerang silik pasal pekara nya,” terang iya.

Abang Johari mansutka jaku nya lebuh dirandau pengudah Pengawa Bejadika Aum Besai Entarabansa Ke-2 Sains Sosial dan Kemanusiaan 2021 (ICOSSH2021) enggau Besiilih Sempekat Pemereti Ati (MoA) entara Perintah Sarawak enggau Universiti Putra Malaysia (UPM) pasal pengawa numbuhka Kursi Pehin Sri Adenan Satem di sebuah hotel, ensanus.

Ubah RUU MA63 ti diperambu dipejurai ba Aum Parlimen kena Hari Dua tu tadi ditangguh nyentuk Luyar Menua nerangka isu bekaul.

Wan Junaidi diripotka madah, lebuh pekara nya dibantai dalam aum Kabinet kepenudi, dua iku menteri udah ngasuh nerangka pekara nya silik agi.

Sebedau tu, Wan Junaidi diripotka madah, ubah Konstitusyen nya beguna amat laban deka nerang pasal penuduk Sabah enggau Sarawak baka rayat iya kelebih agi Pribumi Sabah enggau Sarawak.

Ubah nya dikena mulaika hak Sabah enggau Sarawak ti lenyau baka dipasuk dalam MA63.

Suara Sarawak