Kuching diatu nyadi kaban mengeri hibrid

KUCHING: Mengeri Kuching masuk nyadi kaban gempung mengeri hibrid laban industri dagang ditu majak ngerembai.

Kepala Menteri Datuk Patinggi Abang Johari Tun Openg madahka nyadi sebagi ari kaban gempung mengeri hibrid amat beguna ngagai Sarawak.

“Meri pengaga ati ngagai B-E-Sarawak enggau raban industri dagang laban udah ngasuh Kuching masuk gempung mengeri hibrid.

“Pia mega, meri basa ngagai MyCEB laban udah ngepunka kerejasama nasional enggau Sarawak nyadi bakih industri,” ku iya.

Abang Johari bejaku munyi nya lebuh Bejadika Meet in Malaysia @ Sarawak 2021 enggau Program Ngelancharka Kuching Nyadi Kaban Gempung Mengeri Hibrid di sebuah hotel ditu, kemari.

Ku iya, apin lama Perintah Sarawak bisi ngerintaika Strategi Pemansang Pasca Covid-19 2030 (PCDS) iya nya ngemanahka baru dagang temuai, nyapai pemanah ekonomi, penatai rama enggau rampa menua.

“Sektor dagang sebagi ari strategi tu ungkup tuju dikerembaika, ke alai kitai mesti nemu nguna pansik, penau enggau kaul nengah digital (strategi nuju trasformasyen digital).

“Dalam pengawa hibrid ambika chunto kitai ulih meda baka ni raban orang dagang Sarawak ulih neruska guna digital,” ku iya.

Iya nandu, dunya diatu minta kitai nguna chara nambahka produktiviti enggau pengelengkas sereta numbuhka palan ti kondusif.

“Aku gaga laban raban industri dagang Sarawak udah ngena digital dalam proses dagang sida.

“Ari pengawa hibrid peneleba deka ulih ditambahka mungkur nambahka penemu enggau kunsi serata dunya seraya ulih nyukung perintah nengah PCDS.

“Aku pechaya ulih neruska teladan tu ngagai tikas kerejasama industri nengeri enggau Perintah Besai, ngemanahka enggau ngubah Malaysia lebih manah ari ke udau nengah chara dagang,” ku iya.

Sama bisi datai Menteri Dagang Temuai, Seni enggau Main Asal Datuk Seri Nancy Shukri, Menteri Dagang Temuai, Seni, Main Asal Datuk Seri Abdul Karim Rahman Hamzah enggau ke bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak