Ling Ulok landik belagu enggau nempa lagu

LING Ulok,25, siku nama baru dalam dunya pemerindang Iban ti mai lagu Mujur Mih Nuan.

Asal ari Rumah Subing @ Langan, Ulu Krian, Saratok ngembuan pengerindu belagu kenyau ari umur 9 taun.

Tu beduduk ari iya suah dibai apai enggau indai iya ngulu orang belagu ba Funfair enggau pengerami.

Beduduk ari rindu meda orang belagu enggau betebahka kereban muzik ngujungka Ling mupuk belajar main gitar maya umur agi 13 taun. Udah nya, iya begulai enggau bala bakih numbuhka raban band kediri ba sekula.

LAGU KETERUBAH

LING ULOK

Ling berengkah chakah ba pengawa ngaga lagu sekumbang menua ti sigau ketegal pengerekai Covid-19.

Laban ti jarang mindah, Ling nguna awak nya dikena ngaga leka lagu. Dalam timpuh tiga bulan dia Ling mujur ngasilka lagu solo keterubah diberi nama Mujur Mih Nuan.

Kisah dalam lagu nya ngenang sebana siku lelaki ti seranta besulu enggau siku indu dara anak Penghulu.

Enda memukai indu tu tadi bulih batang pengawa manah ba nengeri. Kenyau ari nya, indu tu lalu buai batu nadai ngirum berita tang nyentuk pulai baru ke menua mai siku lelaki ambai baru nyadika laki iya.

Ling ukai semina ngembuan sada nyawa ti manah enggau landik nebah gitar tang iya mega ngembuan pengelandik nengkebang lagu.

Lebuh ditanya senentang pemar diasai baru masuk dunya pemerindang. Ling madahka pemar nya tetap bisi iya nya pedis ngelaku lagu diri enggau ngulihka sukung ari mensia mayuh. Tu beduduk ari penanggul lebuh sesiku penanyi apin mayuh ngelala.

“Taja pia, penanggul nya teputar mimit laban bisi media rama endur ngelakuka diri awakka mayuh agi orang ngelala.

“Penatai aku lebih dikelala nengah bakih aku ke dulu agi mayuh peminat iya nya Alesandro. Udah lagu aku, dipansutka ba Youtube dia mupuk mayuh orang nemu penatai aku ba dunya pemerindang tu,” ku Ling.

JULUK ATI

Kelimpah landik belagu Ling mega nemu bemain bemain kereban muzik.

Ling madah diri ngembuan juluk deka numbuhka studio kediri ngambika ulih nyaup nempa mayuh agi penanyi Iban.

Pia mega, iya ngarapka lagu-lagu ti ditengkebang iya udah tu ulih diterima mensia mayuh.

”Anang mantul ngapa, sekali udah nyingkang pajak ke aja pejalai nuju adan laban dunya pemerindang tu besai kelimpah dikena ngangkatka adat enggau pengaya jaku bansa kitai.

“Pajakka pengawa nyukung pangan diri taja bisi maya kitai enda sepenemu laban sama bela nengkebang lagu ungkup diri,” ku Ling meri peransang ngagai bala bakih bukai.

Ling mega ngelalau barang sapa ti bisi pengelandik belagu anang malu mantaika diri, ngambika lagu bansa kitai terus ngerembai enggau pegari ba dedini endur.

Sebedau nutup randau, Ling madahka lagu solo ti kedua iya diberi nama ‘Bujang Jugau disadang pansut ujung taun tu.

Lagu nya endang ditengkebang iya empu lalu muzik ditusun Allesandro. Studio rikoding enggau ngasilka kededua lagu tu iya nya Francis Five Studio, ku Ling.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak