Long Busang kena tuntung penusah ampuh bah ti keempat

KAPIT: Sepenyampau 64 pintu bilik peranak ba Long Busang ditu kena tuntung penusah ampuh bah nyentuk empat kaki penalam kemari.

Tuai Komuniti Long Busang, Haji Yusuf Haji Zawawi, 50, madah penusah tu nyadi berindik ari ujan bangat apus hari lalu ngujungka rumah sida di Long Busang ampuh nyau deka maras perabung.

KK HAJI YUSUF HAJI ZAWAWI

“Penusah ampuh bah tu endang suah nyadi ba Long Busang ditu genap kali pengudah ujan bangat.

“Tu keempat kali udah kami ditu udah kena penusah ampuh bah besai baka sehari tu dalam taun tu aja.

“Lalu nyangka mega bisi bekaul enggau penanggul ai ari Tekat Ai Bakun ti selalu nyegang lebuh maya ujan bangat,” ku iya maya dirandau Ruai Suara Sarawak.

Berebak enggau nya, iya madah naka tu semina raban Opis Pengintu Pengelantang Pendiau Raban Bansa (JKM) Pampang Kapit aja udah bisi nganjung bantu bekal pemakai ngagai sida serumah.

“Kami serumah di Long Busang endang chukup beguna bendar ke bantu baka bekal pemakai enggau ke bukai.

“Tu beduduk ari bekal pemakai kami abis kena bah,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak