Palan bebukit nanggul arus internet

SIBURAN: Sekeda palan di Dun Tarat endang bisi napi penanggul internet ti enda deras laban diau ba palan tinggi tauka bebukit.

Adun Tarat Datuk Roland Sagah Wee Inn madahka iya seruran bekaul enggau Sacofa sereta Kaunsil Multimedia Sarawak (SMA) pasal pekara tu.

“Agi bisi palan ‘blind spot’ ditu napi penanggul arus internet enda deras kelebih agi sida ti diau ba palan tinggi tauka bebukit.

“Ditu pan internet enda entu deras, nya alai aku ngarapka raban bekaul ti nyaga pekara tu ngelengkaska agi peneras internet tu,” ku iya.

Iya bejaku munyi nya lebuh ditanya pemberita pengudah Nyuaka Voucher Bantu Meli Pekayan Sekula ari Yayasan Sarawak ditu, kemari.

Ku iya, pekara nya endang agi ngasaka ati kelebih agi ngagai raban nembiak ti bejalaika pengawa belajar enggau ngajar ari rumah (PdPR).

“Bungkur internet ditu endang udah bisi tang sekeda palan endang bisi penanggul internet enda deras.

“Nya alai, kami suah berandau enggau SMA awakka ngaga pansik pekara tu.

“Kitai sabar nganti sida ngatur pekara nya laban kitai nemu sida pan ngambi awak deka ngemujurka penanggul tu,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak