PBB enda ibuh numbuhka sayap ‘putera’ enggau ‘puteri’

KUCHING: Parti Pesaka Bumiputera Bersatu (PBB) enda ibuh numbuhka sayap ‘putera’ enggau ‘puteri ke ngaul raban nembiak ba dalam parti nya.

Mandal Presiden PBB Datuk Abdul Karim Rahman Hamzah madah, ba penemu iya kediri iya beratika parti sida udah bisi sayap orang indu enggau raban nembiak (lelaki) lalu nya ngujungka sayap nya tau enda ibuh.

“Taja pia, nya tepulai ngagai sayap indu enggau raban nembiak deka numbuhka sub-komiti tauka sub-sayap dikena nentuka sida ke beumur 18 taun bela bisi dalam komiti sida.

“Kitai irau, nyema kelalu mayuh sayap ila tusah deka dijaga laba ba penemu aku kediri beratika utai ke dipeda kitai sehari tu udah chukup…,” ku iya.

Abdul Karim ke mega Menteri Nembiak enggau Lumba madah munyi nya ngagai pemberita pengudah Program Ziarah Belia @Samariang 2021 di Dewan Malaysia Jaya, ditu kemari.

Nerang silik, iya madah pekara nya mega nyang deka dikerandau ba renggat parti diri empu laban endang bisi ubah ba politik lebih agi lebu tikas umur  sida ke ulih ngundi udah diinsur ngagai 18 taun lalu udah disetuju.

“Nama utai ke disebut aku diatu sentang PBB, tang nyema bisi parti bukai dalam Gempung Parti Sarawak (GPS) deka numbuhka sayap ‘putera’ enggau ‘puteri’ nya tepulai ngagai sida.

“Laban ba Semenanjung Malaysia, parti nasional sida sigi bisi sayap kediri. Ba kitai di Sarawak enti ba penemu aku bedau datai ngagai renggat baka nya.

“Naka tu, kami bedau berandau laban andal enggau komiti indu enggau raban nembiak PBB ngembuan perambu kediri dikena ngaul raban beumur 18 taun,” ku iya.

Berebak enggau nya, Menteri Muda Undang-Undang, Kaul Sarawak enggau Perintah Besai sereta Matau Projek Datuk Sharifah Hasidah Sayeed Aman Ghazali madah, ungkup orang indu sida udah numbuhka Komiti Nembiak Indu PBB.

“Tuju nya endang dikena mai orang indu ke biak masuk parti, nya alai kitai enda ibuh begunaka sayap baru,” ku iya ke mega tukang wang Komiti Orang Indu PBB.

Suara Sarawak