Pegung ai angat di Sarawak

Pegung ai angat nyadi ari baruh tanah ti ngembuan mayuh macham mineral ti bisi dalam ai angat. Entara mineral ti bisi iya nya baka boron, magnesium enggau silika.

Pegung ai angat diambi nyadi siti chara kena ngubat mayuh macham penyakit baka sakit strok, sakit kulit enggau ke bukai.

Siti pegung ai angat dipelaba ngembuan temparicha entara 40 nyentuk 55 celcius.

Anang remban ngerendam kaki enti kita semua terpeda ka ai ba beberapa iti palan pegung ai angat nya berubah nyadi churak gadung.

Ungkup mensia mayuh ti deka nguji ngerendam kaki ba pegung ai angat, pegung tu enda kamah tang churak ai ti berubah nyadi ketegal sulfur ti bisi dalam ai angat nya.

Lumut ti bisi ba pegung tu nadai ngembuan bau sereta ulih disapu ba tubuh baka kaki enggau jari sereta bekau ya baka kulit nyadi burak beresi sereta lemi ulih dipeda enda datai ari 5 minit.

Diatu, mensia mayuh milih deka berendam di pegung ai angat laban pengawa tu ngembuan mayuh macham pemanah ngagai pengerai kitai.

Entara pemanah berendam ai angat ngagai pengerai iya nya ngubar penyakit kulit, mutarka penanggul baka tusah tinduk tauka insomnia sereta ngelantangka pejalai darah ba tubuh enggau ke bukai.

Ungkup orang Sarawak aja, kita ulih mai diri sebilik enggau bala kaban nemuai ngagai empat iti pegung ai angat ti bisi ba pelilih Lawas, Bau, Padawan enggau Serian.

PEGUNG AI ANGAT

1.Merarap Hotspring

Merarap Hot Spring Retreat ngembuan siti rampa menua ti chukup manah kira-kira 70 km ari mengeri Lawas. Pejalai ngagai endur tu dipelaba sepengalama 3 jam ari Eco-Park Penawan Waterfalls. Pegung tu dipelaba 5 ekar sereta dilinggi babas.

Tu siti endur ti manah kena bejalai ngelantang ati seraya meda pemanah genturung pendiau etnik Lun Bawang ti nyadi komuniti etnik keterubah di menua tu.

Ai angat tu datai ari bukit ti semak enggau endur nya lalu ngembuan empat iti pegung enggau ai berchurak biru enggau pengangat ai ti bebida kena nentuka orang periman ti berendam ulih ngasai perengkaguna baka ba spa ti chukup.

Mensia mayuh mega ulih milih deka berendam nitih pengangat ai ba siti-siti pegung ba endur nya.

Nangkan ke nya, Sungai Trusan ti deras ari ulu sungai ba Merarap Hotspring tu mega muka mayuh macham peluang sereta pengawa ti ulih diatur mensia mayuh baka nginti enggau bemain kayak di sungai.

2.Panchor Hotspring

 

Pegung ai angat Kampung Panchor di Kampung Panchor Dayak urung 45 kilometer ari mengeri Kuching ulih dinemuai nengah jalai Kuching-Serian.

Ngagai mensia mayuh ti deka kitu, pegung tu dibuka ninting ari bepun pukul 7 pagi nyentuk 10 malam.

Pengangat pegung tu ulih datai ngagai 42 celcius, nyadi sebedau kita berendam dalam pegung tu, titihka jaku tangan ti udah dipadah ba pun pintu masuk palan tu baka ngerendam kaki dulu sebedau berengkah ngerendam tubuh enggau belubah dalam pegung nya.

Kepenudi, anang terus mandi ngena ai chelap sepengudah tembu berendam di pegung ai angat.

3.Paku Hot Spring

 

Siti agi pegung ai angat ti benung diadu manah agi di Jalai Air Panas ba siti genturung komuniti Bidayuh di Kampung Sibulung, Bau
Penyauh palan tu ari mengeri Kuching urung 40 kilometer enggau 6 kilometer ari Pasar Bau.

Projek baru ti diatur kena ngangkatka endur tu nyadi palan dagang temuai di Bau iya ya nyedia siti pegung kena mandi sereta siti agi pegung endangdikena ngerendam kaki aja kena nyaga pemeresi endur tu.

4.Annah Rais Hotspring

Siti agi pegung ai angat ti semak enggau genturung pendiau komuniti Bidayuh di Kampung Annah Rais, Jalai Borneo Highland, Padawan.

Kelimpah ari nya mega, palan tu mega bisi nyediaka pegung ai chelap ungkup bala temuai ti deka berendam ba dalam ai chelap.

Pejalai pengelama sejam setengah ari mengeri Kuching deka mai kita nuju siti rumah panjai ti didirika di kaki bukit enda jauh ari garis menua Indonesia.

Nangkan ke nya mega, enda jauh ari Annah Rais Hotspring bisi siti rumah panjai ngembuan 120 iti bilik ti ulih nyadi palan bemalam ungkup mensia mayuh ke deka nguji bemalam ba rumah panjai enggau meda adat sereta main asal komuniti Bidayuh bagi Padawan.

Kredit gambar: Sarawak Tourism


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak