Peminta Nuan, lagu keterubah ari Angel Julian

Lagu solo betabuh Balada dikumbai Peminta Nuan nyadika pemun singkang ngagai siku penanyi baru dibaruh perabung Aka Dambai Production (ADP), Alisa Angely binti Ivy, 19, nujah dunya pemerindang lagu Iban.

Asal ari Tuaran, Sabah suah dikangau enggau nama Angel Julian madahka Lagu Peminta Nuan ditengkebang dua iku diri menyadi Matthius Mambang enggau Jesley Jabu Bajang ti nyeritaka gaya pendiau siku indu ke benung bebagi ati deka nerima tauka enda peminta ari pangan lelaki iya ti keran mai iya jadi.

“Tu lagu keterubah aku ba industri muzik Iban lalu dikena aku ngemunka singkang pejalai aku ba dunya industri lagu Iban.

PEDIS NGAGA PEMUTUS

“Lagu tu mega nusuika pemedis ditapi siku indu lebuh ngaga siti pemutus ti pemadu besai reti dalam pengidup tudah ketegal ari pangan lelaki iya ti keran mai jadi.

ANGEL JULIAN

“Ketegal bai ati kelalu rawan lalu irau sereta nangika rumah tangga didiri jelungan, dia tudah minta pangan iya besabar dulu seraya nganti maya timpuh ti engkeman alai ngaga pemutus.

“Laban ba penemu iya, ati mensia ulih tekalih enggau enda ngira maya lalu enda salah sereta nadai pengerugi lama nganti laban enti udah asap liap seduai sigi jadi,” ku cherita anak pengkuan ari tiga iku diri menyadi nya ngagai Ruai, Suara Sarawak.

“Perambu bekaul enggau pekara deka ngerakam lagu tu udah diatur ba bulan June enggau Julai 2021 tu tadi.

“Tang dilanjarka ngagai bulan September tu tadi laban meri awak alai nembuka pelajar ba taun terubah ba tikas degree dalam bidang pelajar seni visual.

“Lalu semua proses sekumbang ngerakam lagu nyentuk ke maya ngaga video sigi dipatau rat apai aku enggau Cami Tan ti nyadi Pengatur Muzik lagu tu,”ku iya ti mega siku Pengajar Pelatih ba sebengkah Palan Pematih Pengajar (IPGM) di menua tu.

Nangkan ke nya, Angel mega madahka diri balat betapi enggau penangul enda tentu andal lebuh besebutka leka jaku Iban sekumbang timpuh proses pengawa rikoding bejalai.

JAKU TI NYELAI

“Ba aku siku, leka jaku Iban tu chukup nyelai laban beguna ke perati ti lebih, baik nya ari sukut chara nyebut iya enggau ke bukai.

“Penangul besai ditapi sekumbang ngerakam lagu Peminta Nuan tu iya nya aku kurang pengandal lebuh besebutka genap genteran leka lagu mega agi kekakang sekalika leka jaku ti disebut aku nya betul tauka salah.

“Ketegal tu mega ngasuh aku suah kekalat lebuh deka nentuka sada nyawa ti engkeman nitihka tabuh muzik.

“Taja pia, Puji Tuhan, berekat ari iring apai aku empu enggau Cami Tan semua penanggul bekaul sepemanjai timpuh rikoding mujur diputarka taja begunaka awak dua jam alai sikap,” ku iya.

Kenu Angel Julian, iya udah lama chakah dalam industri muzik tang diatu baru deka tampak agi ba dunya industri lagu Iban.

“Aku endang udah lama kenyau ari mit suba minat dalam industri muzik.

“Tang, ba industri muzik Iban tauka Dayak tu keterubah iya aku ngerakam lagu.

DILATIH ARI MIT

ANGEL JULIAN

“Kami semenyadi sigi dipatih ulih apai enggau indai aku belagu kenyau ari mit, tang semina menyadi indu aku ketuai benama Shasha Julian dulu agi terengkah ba industri muzik Iban taun 2016.

“Lebuh belajar ba Sekula Seni Malaysia (SSeMS) Pampang Sarawak di Jalai Santubong sebedau tu, aku mega suah nyereta sekeda pekit belagu,” ku iya ti suah nyadaka lagu pemadu baru ari penanyi Iban ke bukai nengah Instagram iya empu benama aangel.j.

“Ba taun 2014, maya agi besekula ba sekula primari, kala mega enggau masuk pekit lalu mujur bulih lumur tiga.

“Lalu nyentuk sehari tu, mayuh kenang manis diasaika sekumbang nyadi artis tauka penanyi.

“Aku mayuh bulih sukung ari bala bakih besemak engga kebukai sekali nya dikelala tauka enda lebih agi kami sebilik.

“Baka artis dalam dunya pemerindang Iban kebukai aku mega naruh pengarap ngagai industri lagu Iban tu ulih maju baka industri muzik bansa bukai taja tudah diri agi kelalu baru.

“Lalu genap sukung ari peminat enggau mensia mayuh sigi beguna bendar lalu dikenulu ke aku enggau leka jaku terima kasih,” ku Angel ke mega menyadi siku penanyi lagu Iban benama Anatasha Vincent.

Ungkup penerang, lagu Peminta Nuan diatu udah ulih dipeda ba Channel Youtube Aka Dambai Production (ADP) mujur ngerikod sepenyampau 50 ribu iku orang udah meda enggau penyampau ‘like’ urung 3.2K.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak