Peneleba gawa dikunsika Napoleon Lawik ari Pemberita nyadi Pelaut

Napoleon Lawik, 49 sebedau nyadi Pelaut (kerja di tasik) kala gawa nyadi pemberita Borneo Post bepun ari 1 November 1993, Sarawak Tribune sebedau ke misah ngagai Utusan Sarawak (1998) lalu badu gawa ba ejensi media nya urung taun 2010.

Udah nya, iya nguji masuk bidang pengawa baru ba sebengkah kompeni minyak enggau gis (O&G) dikumbai Barisan Samuder nyadi Supervisor Projek.

Kelimpah kala gawa 17 taun ba bidang pemberita , anak lumur tiga ari empat iku diri menyadi asal ari Song, Kapit tu mega kala gawa nyadi Pengajar Sementara enggau nyadi Penyambut Temuai ba sebengkah hotel pengudah abis sekula ba pom lima.

“Laban deka ngasaika baka ni asai gawa ba sektor bukai, dia aku sanggup ngemaduka diri gawa nyadi pemberita.

NYADI PEMBERITA

SENANG ATI…Napoleon (kanan) enggau bakih iya ba kapal Petra Anis, projek shutdown Baram.

“Aku berengkah nyadi pemberita kena 1 November 1993 ba Borneo Post nyadi Pemberita Kes Orang Salah.

“Udah nya, aku gawa ba Sarawak Tribune enggau Utusan Sarawak taun 1998 lalu mungkal opis pampang di Kapit.

“Udah nya, ba taun 2000 sekali agi diberi pengarap muka pampang opis pemberita ba Lawas sebedau dipindah gawa ke Miri ujung taun 2001.

“Taun 2006, aku diberi pangku pengawa nyadi Tuai Biro Wilayah Utara Sarawak mungkur Bagi Menua Miri, Limbang, Lawas enggau Bintulu sebedau badu ba taun 2010 iya nya kira 11 taun ke udah,” ku iya nusui ngagai Ruai Suara Sarawak.

Nangkan ke nya, Napoleon madah diri rinduka pengawa ngasu beburu sereta kala ngambi kus nyelam skuba.

Ngelansa pejalai pengawa tudah diri, Napoleon madah terubah suba iya mina gawa nyadi Pengeluar Orang Gawa nyadi Pelaut ke menua luar.

“Udah nya, aku nyadi Pegawai Orang Gawa ba Cape East, United Kingdom (UK) Pampang Malaysia sementara taun 2014.

“Kelimpah ari nya, mayuh ga pengawa bukai dikereja tang enda ngemantup ati,” ku iya.

Nangkan ke nyadi, Napoleon madah maya gawa kompeni barisan samudera iya dulu diasuh nyadi Pengeluar Permit laban bisi pengelandik bejaku English.

“Udah nya, taun nyin kemari (2020), aku ditikika pangkat nyadi Supervisor Projek nyentuk diatu,” ku iya.

BEMACHAM PENGUJI

BELA LELAK…Pendiau raban ke sama gawa maya pulai ari pantar minyak nuju palan endur diau nepan Fast Crew Boat (FCB).

Kenu ku Napoleon ba semua pengawa dikereja enggau enda ngira ba dedini endur penguji tetap bisi.

“Tang semua penguji nya bepanggai ba pemintar diri napi tauka mutar nyentuk ke iya enda kelalu ngachau pengidup.

“Gawa nyadi Pelaut tu mesti tan ati, mentas kelimpah mesti ‘tebal pending’.

“Laban ke begulai gawa enggau bemacham gaya ulah enggau pendiau mensia dia endang bemacham ulah dipeda kitai.

“Pekara lumur satu dikemerat iya nya jam gawa mesti dititih kelimpah ari ngurangka pengilap awakka kompeni enda napi pengerugi, ukai seringit dua tang manggai bejuta,” ku iya tetap enggau ati baruh.

Semua pengawa ku Napoleon deka dipelajar magang lebih agi baka sida ke ba begian tukang tuchi paip enggau injin dikena orang nyintak minyak tauka gas,”ku iya.

Pengawa nya, ku Napleon chukup besai enti ilap dikereja ulih nganu nyawa orang gawa nyema sida tesirutka gis berachun.

“Bisi mega nyadi kes enda disadag, orang gawa bebadi nyawa ketegal tesirutka gis,” ku iya.

Kelimpah ari nya, Napleon madah pemar kena pejal nembuka sesebengkah pengawa mega siti ari peneleba ke enda ulih diseliah.

“Tu beduduk ari atur kompeni ti deka ngerumban projek nitihka taga tembu ke udah ditetap sereta terus ngemeratka pengelikun diri.

“Bisi sekali maya hari enda manah, aku enggau bala bakih bukai bejalaika pengawa ungkup timpuh dua hari dua malam, nadai mandi nadai betukar gari lalu semina tinduk bepanggal ke lengan ba atas pantar minyak.

“Tuju kami diasuh natam diri gawa dia dikena nentuka injin dikena nyintak minyak enggau gis enda padam.

“Sehari aja enti iya padam, kompeni ulih rugi bejuta ringgit,” ku iya ngenang sida sebuat betubuh 70 iku gawa siang malam nadai ngetu atas pantar minyak ke dikumbai ‘Baram Shutdown’.

Nya alai, nyau pengelama udah gawa kami majak teleba ngereja pengawa nya sereta ulih mutar sebarang penekul tauka penguji ke datai nyengkaum pemar lama ninggalka bini enggau anak ba menua.

“Pemedis maya gawa dipangka gelumbang lebuh hari jai mega udah suah diasai,” ku iya.

MAYA GAWA…Entara bakih ke begulai enggau Napoleon gawa ba tasik.

JAKU PERANSANG

Berebak enggau nya, Napoleon ngelalau barang sapa ke bisi ati gawa nyadi Pelaut tauka gawa ke tasik anang mudah putus pengarap laban ukai semua muntang nitihka peneka diri.

“Nuju rebak baru ti bisi ati deka gawa ke tasik anang kelalu milih pengawa taja berengkah gawa nyadi Rigger, laban ari nya deka belajar mayuh pekara dikena nyapai mayuh agi pemujur dudi hari.

“Udah nya baru tau berunding enggau orang ngambi sebarang kus dikena ngangkatka tikas diri empu.

“Enda ngawa terubah begaji RM100 sehari laban diatu mayuh udah pengereja pengawa di menua kitai (Malaysia) mujur nyentuk begaji manggai RM2000 sehari ketegal penau sereta landik gawa pengudah ngambi kus bekaul,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak