Pengajar mesti lebih inovatif matak nembiak rindu belajar

KUCHING: Raban pengajar mesti berundingka baru langkar chara ngajar enggau belajar ti lebih narit ati, mar enggau lebih interaktif ngagai nembiak kelebih agi lebuh bidang pelajar entara ti balat kena empas ketegal Covid-19.

Kepala Menteri Datuk Patinggi Abang Johari Tun Openg madahka, raban nembiak diatu tebal agi belajar kediri enggau asil bantu ari apai indai tauka penyaga ke alai ungkup nembiak mit chara belajar sida disebut heutagogi (belajar kediri).

“Suba, kelas ulih dipejalaika baka selama iya nya nembiak nyamai nerima penemu, tang diatu laban napi pemar muka kelas betimpai mua, anak kitai nadai chara bukai kelimpah belajar kediri.

“Nya alai, kitai begunaka ubah runding ngagai raban pengajar enggau ngaul sida dalam matodologi ngajar ti lebih inovatif baka belajar terus enggau berunding,” ku iya.

Iya bejaku munyi nya lebuh bejadika Aum Pelajar Prasekula Entarabansa Sarawak ti dipanchar terus nengah Facebook Kaunsil Pemansang Tumu Anak Mit Sarawak (MPAKS), kemari.

Ku iya  empas ari pandemik Covid-19, bidang pelajar ngerembai ngagai pelasar digital ke alai pelasar tu dikena ba serata dunya.

“Enggau pengerembai pelasar pelajar dalam tali arus baka Google Meet enggau Zoom Meeting, nembiak ti ngembuan ulah ke manah ulih dipansutka.

“Nya alai, pengajar beguna dalam nyapai juluk ngemansutka ulah ti manah ngagai penanggul dalam pengawa belajar betemu mua,” ku iya.

Iya mega madahka, pengajar diatu napi gaya nembiak ti jauh udah berubah ari nembiak jeman kelia laban udah balat tebuka ngagai penerang ari mayuh penatai penemu enggau ngembuan ulah deka belajar enggau betanya ti lebih nyentuk.

“Lebuh Covid-19 ngerekai, pengajar nadai jalai bukai kelimpah ngatur baru chara ngajar sida.

“Pia mega, nembiak jeman diatu mayuh agi akses ngagai penerang laban sida udah dulu tebuka ngagai pemansang teknologi,” ku iya.

Iya nyemetak madahka, enggau bantu teknologi pintar baka Google, Youtube enggau Facebook, penerang ulih digiga sebarang maya enggau enda ngira palan.

“Kelimpah ari nya, Covid-19 mega udah mejal raban pengajar ngatur kelas nengah zoom, google meet enggau kangau video ti nunjukka pelasar ngajar enggau belajar patut diubah.

“Nya alai, pengajar ti besemekih mesti nyikap diri enggau peneleba sida dikena ngemuntangka pemar napi pekara pelajar ba jeman ke-21 enggau pengerekai penyakit ti enda ngetu,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak