Pengelantang semua pengarap terus dijaga

TATAU: Perintah Sarawak deka terus nyaga pengelantang semua institusyen pengarap di menua tu nengah agih bantu ngaga tauka nyeruri rumah sembiang ti udah bisi.

Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai madahka pekara tu nyata dipeda nengah penumbuh Unit Pekara Pengarap Bukai (Unifor).

Ku iya, nengah Unifor bantu nuju rumah sembiang ulih ngelempungka tating enggau meri penyamai ngagai raban sida lebuh besembiang nitihka pengarap sida empu.

Iya madahka Perintah Sarawak ba baruh pegai Kepala Menteri Datuk Patinggi Abang Johari Tun Openg, institusyen pengarap tu nyadi pelasar pemanah ulah, negapka ruang bilik enggau mensia mayuh di menua tu.

Adun Kakus nya mansutka pekara nya rambau Nyuaka Geran Unifor ngagai dua buah gerija di Pelilih Menua Tatau iya nya Gereja Sidang Injil Borneo (BEM) Pekan Tatau enggau Gereja Methodist Iban Sungai Muput Kanan, kemari.

Dua buah gerija tu bela nerima bantu RM150,000 sebuah.

“Tu meh penyelai nengeri kitai, pengelantang entara pupu bansa ulih ngasuh kitai diau manah sereta nadai penanggul.

“Pekara ti pemadu beguna iya nya genap iku kitai ti diau ba nengeri tu mesti bebasaka bansa enggau pengarap bukai sereta nyeliahka sebarang isu ti ngachau pengelikun menua,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak