Pengeransing Bala nupi ikan pegung dipuji

SRI AMAN: Menteri Muda Pengintu Pendiau enggau Pengelantang Komuniti Datuk Francis Harden Hollis muji pengeransing pedagang ikan di Sungai Tandok Ulu, Tuai Rumah Bala Buntok.

Ku iya, asil ikan dijual ari lima pegung enggi Bala enggau bini iya Sia Tugang ngemantupka ati enggau nyadi pemansut belanja tambah ngagai sida nya sebilik.

“Seduai melaki bini ransing nyual ikan pegung ngagai peranak rumah panjai ke diau ba sitak Batu Lintang Undop sereta ke Pasar Lubok Antu din.

“Aku gaga endar ati meda pengeransing seduai melaki bini tu ngemansangka dagang ikan pegung kelebih agi ikan sungai,” ku iya.

Harden bejaku munyi nya lebuh limpang ngabas pegung ikan Bala di Sungai Tandok Ulu ditu, Hari Dua tu tadi.

PUN PENATAI BELANJA BALA SEBILIK… Pegung ikan Bala enggau bini iya.

Ku iya, Bala enggau bini iya nadai napi penanggul lebuh bejualka ikan pegung laban semampai bisi peminta ari mensia mayuh.

“Tu meh juluk ati perintah, deka meda rayat ulih gawa ngatika diri nengah bantu dataika ulih nambahka asil tauka rembus ngagai makit luar,” ku iya.

Ba lansa sama, Bala madahka entara bansa ikan ti ditupi seduai melaki bini baka Ikan Tegadak, Jelawat, Tilapia Mirah, Lee Koh enggau Song Hu.

“Ikan tu diasuh aku betelu, netas lalu anak iya ditupi aku baru. Tu ulih ngelimat puku kami duai.

“Entara rurun pengawa nupi ikan baka nyendiaka ai baru ungkup anak ikan sebedau ikan nya besai dalam kandang 12 bulan.

“Pemerat ikan ti manah dijual urung 800 gram nyentuk 1.5 kilogram (kg),” ku iya.

Kelimpah ari nupi ikan pegung ku Bala, seduai melaki bini mega bisi nanam sayur bukai baka petai, terung Dayak enggau lia dikena nambahka belanja.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak