Pengundi biak nentuka nasip nengeri dudi hari

ASAJAYA: Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah nyukung pengawa nginsur umur pengundi ngagai 18 taun (Undi18) ba selampur menua.

Ku Karim, iya nyukung sida ke beumur lebih ari 18 taun diberi hak ngundi maya Pengawa Bepilih Besai (PRU) tauka Pengawa Bepilih Nengeri (PRN) ke deka datai.

“Bepelasarka Akta Umur Dewasa 1971, sida ke beumur 18 taun udah nemu sereta udah tuai runding.

“Sebedau tu, di baruh Akta Pilihan Raya 1958, umur ngundi nya 21 taun.

“Aku andal pengawa nginsurka umur pengundi ngagai 18 taun nya pekara ti manah laban kitai ulih meda tebal agi umur ngundi di menua bukai nya berengkah ari 18 taun,” terang Karim.

Karim mansutka jaku nya pengudah bejadika Pengawa Nyuaka Anugerah Nembiak Nyulut ngagai Nembiak Sekula Sekondari (SMK) Asajaya di Balai Opis Pelilih Asajaya, ensana.

Ku iya, rayat Malaysia ke beumur 18 taun enggau tuai ari nya nyengkaum sida ke diau ba menua luar deka dierejister nyadi pengundi chara otomatik berengkah 31 Disember tu.

“Sebedau, mensia mayuh mesti rejister dulu nyadi pengundi. Enti sema sida enda rejister taja beumur 25 taun, sida enda dikemendar ngundi maya pengawa bepilih.

“Tang penerang dalam RUU ti dikenuku dalam Aum Parlimen 2019 madahka hak nyadi pengundi maya aumur 18 taun nya otomatik,” terang iya.

Nambahka nya, Karim madahka penemu politik rebak biak engka manah agi ari sida ke lebih tuai lalu nya pekara ke patut diterima enggau manah.

“Tang, penuai runding ari sukut politik engka kurang agi ari sida ke tuai.

“Nya kebuah, aku ngarapka sida deka ngena peluang tu nambahka penemu politik lalu anang jampat milih nitihka peneka sida.

“Kebuah pia laban sida mesti meretika penemu politik enggau nemu pasal nasip nengeri enggau menua lima taun ke deka datai nya bepanggai ngagai pemutus sida,” ku iya.

Suara Sarawak