Perais bekebun festigasyen dikena nambahka penatai pemisi

KUCHING: Gerempung Anak Asi Sarawak (Perais) ngemujurka pengawa betanam betupi moden kelebih agi nengah chara fertigasyen dikena nambahka penatai pemisi gerempung nya.

Presiden Perais Rapelson Richard Hamit madahka iya berasai gaga laban juluk ati Perais masang sistem fertigasyen nengah kerejasama Menijar HFE Agro Resources Sdn Bhd Ahmad Syafiq udah berengkah dipejalaika ensana pengudah lama ditangguh ketegal Atur Mindah Betagang (PKP).

“Sistem fertigasyen nya mujur dipasang ba kebun gerempung di Kampung Temelan Dayak, Lundu ngaul 500 polibag nanam chabi.

“Program tu sebuah program komuniti dikena nambahka penatai pemisi gerempung enggau raban bekaul,” ku iya.

Rapelson bejaku munyi nya dalam siti penerang media, kemari.

Rapelson (kiba) nerima setipikit kus latih betanam betupi moden nengah chara fertigasyen di Kampung Temelan Dayak, Lundu.

Ku iya, sida andalka raban Perais ulih ngaul diri dalam bidang betanam betupi moden fertigasyen awakka ulih nambahka penatai pemisi lebuh napi pengerekai pandemik Covid-19.

“Kelimpah ari nya, pengawa tu mega ulih mantu ngemanahka ekonomi lebuh menua udah ngalih ngagai renggat endemik Covid-19 nangkan ke tu,” ku iya.

Iya madahka, kus latih betanam betupi moden nengah chara fertigasyen tu udah diatur ngena zoom ba bulan Mei tu tadi.

“Perais meri terima kasih ngagai semua raban bekaul ti udah ngemujurka program tu.

“Program tu mega bisi disukung Sapit Menteri Pengawa Bekebun enggau Komoditi ti mega Kaban Parlimen Puncak Borneo Datuk Willie Monggin nengah geran ungkup pemansang Orang Nyelai Pendiau (OKU),” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak