Peranak Emplaie Ulu temegah enggau pangkat basa diterima Prof Dato Dr Spencer Empading

SARATOK: Peranak rumah panjai di Emplaie Ulu ditu berasai temegah ke pemujur Profesor Dato Dr Spencer Empading anak Sanggin ti udah nerima Pingat Panglima Setia Bintang Sarawak (P.S.B.S) ti ngujungka nerima gelar Dato, ensana.

Tuai Rumah (TR) Emplaie Ulu, Gending anak Danggat madah, pemujur Dr Spencer nerima pangkat basa ari Tuai Pemegai Menua ( TYT) Tun Abdul Taib Mahmud nya patut nyadika peransang tauka chunto ngagai sida serumah lebih agi raban nembiak rebak baru.

TR Gending Danggat

“Pemujur iya tu patut patut nyadika peransang ngagai nembiak ke benung besekula tauka nampung pelajar sida ba dedini Palan Pelajar Tinggi (IPT) dimenua tu.

“Chukup temegah, laban Profesor Dato Dr Spencer Empading udah nyadi orang keterubah ari kami serumah ari Emplaie Ulu bulih pangkat basa begelar Dato ari TYT Sarawak.

“Tu mega siti sejarah ngagai kami serumah. Kelimpah ari nya, iya mega siku ari peranak rumah panjai kami ngembuan pemandai tikas PhD ari University menua luar taun 1993,” ku iya madah ngagai Ruai, Suara Sarawak.

Ungkup penemu Dr Spencer ngembuan PhD pasal Pelajar Anak Mit ari North Carolina State University, Amerika Syarikat (USA).

Udah nya kala nyadi Dekan Fakulti Sains Sosial, Universiti Malaysia Sarawak (Unimas) ari taun 2008 nyentuk 2013, Professor ba Fakulti Sains Sosial & kemanusiaan (Unimas) enggau mayuh agi pangku pengawa ke besai.

Nangkan ke nya, peranak ari Saratok ke bela bisi nerima pangkat basa ari TYT iya nya Pemancha Thomas Lamit Lutik ti nerima pangkat Pegawai Bintang Kenyalang (P.B.K), Kaunselor Edmund Uda Maleng, nerima pangkat Ahli Bintang Sarawak (A.B.S) enggau Inchie Jenggin, pangkat Bentara Bintang Sarawak (B.B.S).

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak