Politik Sarawak tegap

SRI AMAN: Rayat nentuka nasip menua tu ngambi tegap, mansang enggau likun, ku Kepala Menteri Datuk Patinggi Abang Johari Tun Openg nyemetak madah.

Ku iya, tuai menua deka betukar tang rayat mesti ngetanka penyerakup enggau pengelikun ba Sarawak.

“Kitai bedau napi pengawa bepilih tang orang seberai nyin (Melaka) enda lama agi deka ngatur pengawa bepilih lalu tu mandangka penegap politik di Sarawak.

“Kebuah pia laban kitai ngemeratka pemansang lalu pengudah ‘beduk’ (gendang) deka bemunyi (pengawa bepilih nengeri Sarawak) sigi mayuh cherita pansut tang aku ngelempaika pekara tu ngagai rayat nentuka nasip menua,” terang iya.

Abang Johari mansutka jaku nya ba Pengawa Ngelancharka Ejensi Pemansang Sri Aman (Sada), kemari.

Abang Johari ke mega Chairman Gempung Parti Sarawak (GPS) nyemetak madah, agih belanja Sarawak nambah ari sukut jereki kenyau ari empat taun udah ngemudi menua.

“Kitai ukai bejaku ngapa tang pekara tu nyata pengudah kitai ngagihka belanja lebih RM10 bilion dalam Bajet 2022 ungkup pemansang menua tu.

“Pia mega, kitai ngagihka belanja RM5.3 bilion dikena nagang pandemik Covid-19 ngambi nyaup rayat nentuka sida enda suntuk belanja,” terang iya.

Ku Abang Johari, perintah mesti pintar ngaga perambu enggau pemansut Sarawak manggai RM7 bilion ari asil chukai minyak enggau gis.

“Taja kitai bisi perambu enggau agih belanja tang pekara nya deka tebasau enggau enda ulih dipejalai enti sema kitai pambar.

“Lebuh nyadi ketuai, kitai mesti lurus ati mantu rayat lalu manggai 40 taun aku ngaul diri ba politik tu endang bisi penguji iya tang aku enda kala meda sejarah pangku pengawa Menteri Besai betukar ninting taun,” terang iya.

Abang Johari mega madah, seagi diberi mandat, Adun Satok nya deka neruska pengawa nagih hak Sarawak baka dipasuk dalam Sempekat Malaysia 1963 (MA63).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak