PRN12 : Nadai chalun baru ari PRS

KUCHING: Parti Rakyat Sarawak (PRS) udah nganjung rintai nama chalun ke deka disabung bediri ba Pengawa Bepilih Besai Nengeri Ke-12 (PRN12) nyengkaum ngerintaika semua penyandang penuduk Dun ke diatu.

Kenu ku Tuai Raban Nembiak PRS Datuk Snowdan Lawan, semua nama nya udah dianjung ngagai Kepala Menteri Datuk Patinggi Abang Johari Tun Openg ngambika diaku.

“Nama-nama tu udah dikerandau sereta disetuju ba renggat parti betuaika Presiden PRS Tan Sri Datuk Amar James Jemut Masing.

“Naka tu kami ngerintaika semua penyandang ke bisi bediri baru lalu nadai chalun baru.

“Tang nya tepulai ngagai Kepala Menteri berati enggau ngaga pemutus bepelasarka rikod pengawa semua chalun,” ku iya.

Snowdan ke mega Menteri Muda Nembiak enggau Lumba madah munyi nya ngagai pemberita maya ngambat pemulai atlit gumpal isi menua ba Padang Bilun Entarabansa Kuching (LTAK), ditu, kemari.

Ku terang Adun Balai Ringin inya, selalu iya nama ke dichalun tauka diperambu presiden nadai penanggul nyadi chalun.

“Aku mega siku ari kaban komiti milih chalun parti, selalu iya nama ke diperambu ba renggat parti sigi nadai penanggul ba renggat atas.

“Utai ke beguna diatu kitai nganti lalu peda. Nyema bisi ubah, nya engka nyadi ba renggat kepenudi. Tang naka tu PRS ngerintaika baru nama semua penyandang,” ku iya.

Nerang silik, Snowdan madah iya deka terus ngetanka penuduk iya ke dipegai kenyau tiga penggal ke udah.

“Aku andal ulih menang lalu pia mega enggau chalun PRS ke bukai laban kitai nemu dini pengering tauka gaya pengawa diri. Pekara tu mega ditemu Kepala Menteri.

“Tambah mega agi mayuh menua ke patut dikemansang lebih agi ba menua pesisir lalu nya begunaka amat pengawa tu disambung,” ku iya.

Ungkup rikod, penuduk asal ke endang ungkup Dun PRS semina 11 aja iya nya Baleh, Murum, Belaga, Pelagus, Ngemah, Kakus, Tamin, Samalaju, Batang Ai, Balai Ringi enggau Bukit Begunan.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak