Program ngambi khas pengajar lebih mayuh ba Johor, Sabah enggau Sarawak

KUCHING: Opis Menteri Pelajar (KPM) deka ngeletakka sepenyampau ti lebih mayuh ungkup program ‘ngambi khas’ pengajar tauka Pegawai Servis Pelajar DG41 ungkup Johor, Sabah enggau Sarawak.

Sapit Menteri Pelajar ll Datuk Mohamad Alamin madahka penanggul suntuk pengajar agi balat ditapi tiga buah nengeri tu.

“Komiti Opis Pelajar (SPP) agi benung proses intebiu ngambi raban pengajar nya (one-off recruitment).

“Nitihka randau enggau Menteri Pelajar sereta bala menteri bukai, pengelebih ngambi bala pengejar tu deka diberi ngagai Johor, Sabah enggau Sarawak,” ku iya.

Iya bejaku munyi nya ba aum media pengudah ngabas Sekula Primari (SK) Pelajar Khas (B) Kuching ditu, ensana.

Iya madahka, sida deka ngaga peminta mayuh agi pengajar ngagai tiga buah nengeri tu awakka ulih nampung penanggul suntuk pengajar nya.

Nangkan nya, Mohamad madahka dua buah sekula di Lawas agi ditutup naka 6 Oktober ti deka datai iya nya SMK Trusan enggau SMK Merapok.

“Sekula tu agi ditutup laban siku pengajar di SMK Trusan enggau dua pengajar di SMK Merapok ditukuka positif Covid-19.

“Opis Menteri Pelajar (KPM) enggau Opis Menteri Pengerai (KKM) netapka atur terit ngagai pengajar, nembiak tauka pengereja pengawa ba sekula ti ngerikodka kes Covid-19.

“Opis Menteri mega udah ngeluarka surat nutup dua buah sekula tu ngagai KPM awakka ulih dipatau,” ku iya.

Suara Sarawak