Program Voice Stars ungkup OKU udah berengkah

Marcos anak Joel asal ari Tanjung Bijat, Sri Aman diatu benung chakah ngemujurka Pekit Belagu Online Renggat Entarabansa dikumbai Voice Stars (VS).

Ungkup peminat cherita drama pengidup ba Radio Waifm Iban tentu mensia mayuh kala ninga nama Entirung disebut pengeluar program nya drama nya ari taun 2014 enggau 2015 suba. Nyadi orang ke ngeluluka diri ngena nama Entirung tu mih Marcos Joel.

“Pemun pejalai aku dalam dunya pemerindang iya nya lebuh aku masuk program Mentor 6 ba TV3 taun 2012.

“Ba program nya, aku mujur dipilih nyadi ‘Protege Pilihan’ Mentor 6 lalu bepun ari nya pejalai aku dalam dunya pemerindamg majak ngerembai lalu diatu benung chakah nengkebang lagu.

“Kelimpah, kala mega ngeluarka lagu solo sereta dikanggau melakun ba radio enggau televisyen dimenua tu nya,” ku iya.

PROGRAM VOICE STAR

MARCOS JOEL

Nyerita silik pasal Pekit Karaoke Voice Stars (VS), Marcos madahka program tu diatur nengah chara online ungkup Orang Timpang Pendiau (OKU) renggat entarabansa.

Tu mega program keterubah diatur Gerempung Orang Buta Malaysia (SBM) nengah kerejasama Komiti Pemansang Nembiak (JPB), The Actors Studio & The Kuala Lumpur Performing Arts Centre sereta Leo Club of Kuala Lumpur Central.

“Voice Stars tu, pekit belagu chara online renggat entarabansa keterubah diatur komuniti OKU bepenanggul ba mata.

“Pekit tu tebuka ngagai semua orang OKU enggau enda ngira bansa penimpang dikembuan sida, semua dikelaluka nyereta pekit tu magang,” ku iya ke mega OKU bisi penanggul ba mata.

Nangkan ke nya, Marcos madah Program VS deka diatur sepengelama lapan minggu lalu rengat keterubah konsert udah berengkah diatur kenyau 9 Oktober tu tadi.

VS RENGGAT KEDUA

PROGRAM VOICE STARS

“Rengat kedua konsert VS berengkah kemari (16 Oktober) iya nya pengudah mujur milih pemekit ari renggat keterubah,” ku iya.

Program VS tu ku iya bisi dipasuk pemekit ari Indonesia enggau Brunei kelimpah pemekit ari menua tu empu lalu ulih dipeda ba Ruai The Kuala Lumpur Performing Arts Centre (klpac) ninting Hari Enam, Pukul 9 malam.

“Pia mega, kami mega bisi ngatur Program Ngumpul Belanja ungkup pekit tu,” ku iya.

Penerang silik pasal program tu ulih betelefon terus ngagai Marcos ba lumur 012-6713177.

Marcos madah diri kala mansutka dua iti lagu solo dikumbai Pengerindu Nyerarai (2012) lalu iyaka pemadu baru dikeluarka taun 2020 iya nya Senyum Paling Jujur enggau Ati Aku Udah Bebali.

Juri Pekit

Udah tu ila, taun baru Marcos merambu deka ngemansutka siti agi lagu baru.

“Nya alai, aku meri terima kasih ngagai semua bala bakih besemak, kami sebilik, Ruai, Suara Sarawak, KLPAC enggau Leo Club of Kuala Lumpur Central laban udah besaup nyukung program tu.

“Enda tinggal mega nuju siku-siku orang, agensi enggau kompeni ti udah mantu sekalika ari sukut belanja tauka produk sida baka Abella Trigona, Nawarna Enterprise, CKT Lagend enggau Kaban Music Production (KMP).

“Arap pekit tu terus mujur nyadika pelasar endur mandangka pengelandik raban OKU ba pengawa belagu,” ku iya.

Pekit Belagu Online Voice Stars tu mega nerima sukung penuh ari Opis Menteri Dagang Temuai, Seni enggau Budaya (MOTAC).

 

Produser Program Voice Stars
Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak