Pun pisang bebuah nyelai

KABONG: Pengudah manggai setaun nganti, pun pisang tanduk diempu siku peranak di Kampung Perpat ditu udah mansutka pendiau buah ke nyelai.

Enti dipeda, pun pisang tu sebaka enggau pun pisang ke bukai tang penyelai iya, tandan buah pisang nya nyau datai ba tanah laban tandan nya panjai lebih enam kaki.

Pengempu iya, Karim Man beumur 50-an ari Kampung Tengah Perpat madahka pisang ditanam iya nya baru bebuah taun tu.

NYELAI… Pisang tanduk diempu Karim matak perati mensia mayuh laban tandan nyau tumbuh datai lima kaki pemanjai.

Ku Karim, buah nya ulih diempa tang iya enda kala nyepi baka ni asai buah pisang nya dibanding buah pisang bukai ke ditanam iya.

“Gagit amat terubah meda pisang nya mansutka tungkul pisang nyentuk nyadi tandan pisang ke panjai amat.

“Aku enda berundingka rega enti buah pisang nya dijual tang aku berasai tepantup ati pengudah pisang nya bebuah nyelai enggau matak perati mensia mayuh,” terang Karim.

Ngelansa silik, Karim madahka benih pun pisang nya diambi ari bakih iya lalu dibai pulai sereta ditanam ba mua rumah kenyau ari setaun ke udah.

Terang iya, tungkul pisang nya panjai amat lebuh keterubah mansutka tungkul jantung iya nya lima kali lipat pemesai ari tungkul pisang ke bukai.

Diatu, iya madah enda sabar nganti buah pisang nya mansau laban deka nyepi buah pisang nya.

Ungkup penerang semua, Kampung Perpat nya penyauh urung 40 minit pejalai ari Pasar Kabong.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak