Rambai jaku Malaysia Sebilik inisiatif nyumanka menua

KUCHING: Rambai jaku Malaysia Sebilik nyadi inisiatif pemadu manah ke teladan Perintah Besai nyumanka menua, ku Menteri Besai Datuk Seri Ismail Sabri Yaakub.

Ku iya, nengah integrasyen nasional besilih budaya pekara nya deka nyadi pelasar ti tegap ungkup semua rayat Malaysia dalam napi semua pemar, ngerami bida pupu bansa, ngiga ulah ti sebaka lebuh negapka penyerakup enggau integrasyen nasional ari semangat Malaysia Sebilik.

“Tu meh kitai sebilik ti idup nyamai enggau lantang. Kitai semua tu meh Malaysia Sebilik.

“Enggau integrasyen nasional besilih budaya, bansa Melayu, China, India, Orang Asli enggau ke bukai sereta 27 bansa Bumiputera Sarawak, ke alai 42 bansa enggau lebih 200 subetnik Anak Nengeri Sabah.

“Aram! Kitai tegap begulai napi penguji. Sempama baka ‘sakit sama mengaduh, luka sama menyiuk’,” ku iya lebuh Bejadika Malaysia Sebilik, ba Palan Aum Borneo Kuching (BCCK), kemari.

Iya nyemetak madahka, runding Malaysia Sebilik diperambu perintah diatu ukai retorik tauka jaku ngapa, tang nya siti semangat ti dibai perintah megai menua ungkup pengelikun rayat ti mesti dijaga baka nyaga sebuah ruang bilik.

“Kitai ngambi chunto sebuah ruang bilik, enti bisi ruang bilik ti kurang benasip manah dalam pengidup, udah tentu kitai deka meri bantu sereta enda ngelakka sida kediri.

“Baka nya mega enggau atur perintah diatu. Malaysia Sebilik baka raban B40 enggau M40 ti balat kena pangka ketegal pandemik, deka terus diperatika enggau pemadu beguna sida ulih bulih pemaik nengah bantu perintah,” ku iya.

Tandu iya, seriris enggau nya, pemansang sosio ekonomi menua, di nengeri bukai ti agi bedau mansang deka terus dikemeratka kelebih agi Sarawak, Sabah, Kelantan, Terengganu, Kedah enggau Perlis awakka ulih ngerapitka bida pemansang ekonomi entara nengeri, wilayah, mengeri enggau menua pesisir, ngambika pemanah ekonomi ulih sama diasaika.

“Ungkup tuju nya pengabis nadai 50 peratus ari agih pemansang pemun perintah besai dalam Langgur Pemansang Malaysia Lumpar Ke-12 (RMK-12) deka diagihka ngagai enam nengeri tu.

“Nyengkaum nyendiaka infrastruktur pemun, pekara digital, pelajar, servis ngintu pengerai enggau pemansang ekonomi. Chara ti sama mega deka nyadi pekara Bajet 2022 ti deka dipejuraika ba minggu baru,” ku iya.

Ku iya, dalam nyapai tuju Malaysia Sebilik ti nekanka ulah ‘keterangkuman, kebersamaan enggau kesyukuran’, perintah deka matau semak pejalai program enggau inisiatif ti udah dilanggur, kelebih agi Sabah enggau Sarawak awakka sama ulih mansang nyadi Malaysia Sebilik.

“Mayuh program enggau inisiatif ti udah enggau deka dipejalaika ba baruh Malaysia Sebilik nyengkaum Rumah Ikram Malaysia Sebilik, Skuad Malaysia Sebilik, Pakej Peranti Malaysia Sebilik, Pakej Ngintu Covid-19 Malaysia Sebilik, Malaysia Sebilik Nyikap Penusah, Yayasan Pengelantang Nembiak Pelajar Tinggi Malaysia Sebilik enggau Residensyen Rumah Malaysia Sebilik.

“Tu meh program enggau inisiatif Malaysia Sebilik ke alai genap opis menteri deka ngemansutka pengabis nadai siti program enggau inisiatif ti ngembuan tuju mantu ngurangka pangka ekonomi ti ditapi rayat lalu aku ngarapka pengawa tu disukung perintah nengeri,” ku iya.

Iya nyemetak madahka, dikena matau pejalai pelasar Malaysia Sebilik, ‘Keberhasilan Kebahagiaan’ tauka ‘Key Happiness Outcome’ (KHO) udah digaga ungkup ngemenuhka ‘Petunjuk Prestasi Utama’ (KPI).

“KHO enggau KPI tu nyadi komitmen enggau pengingin perintah, awakka mai menua keluar ari pengelelak pandemik. Pia mega, kitai deka ngemanahka penuduk menua dalam tikas Indeks Pengelantang Dunya laban diatu kitai diau ba penuduk ke-81 ba taun 2021,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak