Rayat diau ba pelilih Barat dipinta bejejaga ari penusah bah

KUCHING: Rayat Sarawak kelebih agi di pelilih Barat dipinta bejejaga enggau penusah ampuh bah bekau ari ubah gaya angin monsun Timur Laut ti deka datai.

Direktor Opis Bomba enggau Penyah Penusah Malaysia (JPBM) Sarawak Khirudin Drahman madahka mensia mayuh patut udah nyikap diri ari diatu laban penusah bah dipelaba nyadi nyerumba penatai angin monsun Timur Laut kena bulan Disember nyentuk ujung bulan Januari taun baru.

“Angin monsun Timur Laut dipelaba deka berengkah ba Semenanjung Malaysia kena bulan Oktober enggau November sebedau ngalih ngagai Sarawak pun bulan Disember.

“Opis Metrologi Malaysia melaba bisi penusah bah nyadi maya nya, nya alai pekara tu patut ditesau ngagai mensia mayuh dulu awakka sida nyikap diri empu,” ku iya.

Khirudin bejaku munyi nya ba aum media Program Nyikap Monsun Timur Laut 2021/2022 di opis JPBM Sarawak ditu, kemari.

Ku iya, chara pemadu manah ngagai sida lebuh nyikap diri ari penusah bah iya nya meri pelajar enggau penyedar ngagai mensia mayuh.

“Program lalau enggau pelajar mutarka penanggul lebuh bah nyadi entara chara pemadu manah digaga kami ngajar rayat di menua tu.

“Terima kasih ngagai raban media laban udah nyadi pelasar endur kami nesau sereta meri penerang ngagai rayat pasal penusah bah ti dipelaba deka nyadi.

“Nengah chara tu kami ulih ngurangka pangka penusah ngagai tikas pemadu baruh,” ku iya.

Iya madahka, sida udah nyikap sekeda perengkaguna ti dikena mantu penusah bah lebuh nyadi ila baka dua buah bilun terebai, 37 unit bot nyelamat, 16 buah lori, dua iku ukui pemansik K9 (dikena nyidi bangkai lemas) enggau ke bukai di serata Sarawak.

“Kami mega ngidarka penerang pasal chara nyaga pengelikun, nama ti patut digaga, nama ti patut dibai enggau sekeda penerang beguna bukai ba ‘risalah’ ngagai rayat Sarawak ti dichelak dalam jaku Melayu, English enggau China.

“Penerang tu diperambu deka disalin ngagai jaku Iban enggau Bidayuh enda lama agi.

“Kelimpah ari nya, genap pengkalan servis kami udah nyikap bekal pemakai rangkai ungkup peranak ti napi penusah bah,” ku iya.

Suara Sarawak