RM6.8 bilion asil penatai pemisi diulih perintah nengeri ari SST

KUCHING: Perintah Sarawak nerima RM6.8 bilion asil ari chukai jual nengeri (SST) ba produk petroleum bagi timpuh 2019 nyentuk September taun tu, ku Kepala Menteri Datuk Patinggi Abang Johari Tun Openg.

Ku iya, nengah asil nya perintah nengeri ngembuan pengelebih bejalaika mayuh pakej bantu BKSS napi pandemik Covid-19 ti meri pangka ngagai rayat, kelebih agi raban orang dagang mit sereta orang dagang mit enggau jelan pemesai (PKS).

“Tang, taja pan Asil Kasar Dalam Menua (KDNK) bisi nguchup entara enam ngagai tujuh peratus bekau pengerekai pandemik Covid-19.

“Bisi pengelantang mimit laban pemulai asil nengeri nambah ari RM6 bilion ngagai RM10 bilion laban chara ti kreatif dipejalaika nengah ‘revenue re-engineering’ udah meri asil besai ngagai ekonomi Sarawak,” ku iya.

Abang Johari bejaku munyi nya ba Pengerami Makai Lemai Beserimbai Hari Pengada Ke-85 Tuai Pemegai Menua Nengeri Tun Pehin Sri Abdul Taib Mahmud di BCCK, malam ensana.

KEK HARI PENGADA…Tuai Pemegai Menua Tun Pehin Sri Abdul Taib Mahmud nyirap kek hari pengada iya ba Pengerami Makai Lemai di BCCK, malam ensana.

Ku iya, perintah udah bejalaika tujuh pakej bantu rayat beungkus RM5.3 billion nambahka agih belanja RM2021 ti pemadu besai dalam sejarah nengeri iya nya RM10.1 bilion dikena ngurangka empas ari pandemik.

“Tu bedau nyengkaum agih khas beungkus RM91 juta lebih ngagai Komiti Penyangga Penusah Nengeri (JPBN) dikena nampung belanja mutarka pandemik di menua tu.

“Tu mega nyengkaum ungkus logistik bekaul vaksin, nambahka kapasiti perengka pengerai enggau wad ICU, mayar hotel nyadi palan kuarantin enggau belanja ungkup bekal bakul pemakai.

“Bantu enggau agih belanja tu dikena nentuka genap rayat diperati, disukung ari sukut dagang ngujungka ekonomi kitai terus beretan taja pan nerima empas balat lebuh Covid-19,” ku iya.

Ngelansa dalam agi, iya madahka ba taun 2020 ekonomi Sarawak udah nguchup 3.2 peratus laban pengelabuh ekonomi dunya ti pemadu baruh kenyau Perang Dunya Kedua bekau ari atur nyekat penumbuh ekonomi baka Atur Mindah Betagang (PKP).

“Tang enggau atur agih belanja ti manah, nengeri udah napi pemar taun ke udah enggau manah ke alai ba taun tu ekonomi Sarawak dipelaba deka ngerikodka penumbuh ti positif entara empat ngagai enam peratus.

“Nya alai, perintah nengeri deka terus besemekih nentuka ekonomi Sarawak ulih ngerembai ba timpuh pandak enggau panjai ngambika meruan ba pelasar ti betul nyapai status nengeri maju penatai pemisi tinggi ba taun 2030,” ku iya.

Berebak enggau nya, ba pengerami besai malam nya Tun Taib bisi nyirap kek hari pengada iya seraya meda program khas belagu sereta betanda nyengkaum video khas dikumbai ‘Abdul Taib Mahmud: The Untold Story Part Two’.

Sama bisi datai Toh Puan Datuk Patinggi Ragad Kurdi Taib, Speaker Dun Datuk Amar Mohamad Asfia Awang Nassar enggau ke bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak