Sebedau pulai menua peresa status Covid-19

KUCHING: Rayat Sarawak ti deka pulai ke menua bekau ari atur perintah ti udah ngemendarka mensia mayuh neresa pelilih menua dilalau ngaga peresa status Covid-19 kediri dikena bejejaga.

Sapit Kepala Menteri ti mega Chairman Komiti Penyangga Penusah Nengeri (JPBN) Datuk Amar Douglas Uggah Embas madahka tagang neresa pelilih menua diketuka bekau ari kes positif Covid-19 di Sarawak bisi nurun.

“Taja pia, sebedau pulai ke menua, jaga pengelikun aki, ini, apai, indai enggau kaban belayan kita empu ari meresa Covid-19 kediri nengah kit ti dibeli ba farmasi.

“Anang enda ingat ngena sengkabung mua, nyaga takah sereta anang guai begelumu taja pan diau ba menua,” ku iya.

Uggah bejaku munyi nya ba program sampi terima kasih beserimbai enggau Hari Pengada Ke-85 Tuai Pemegai Menua Tun Abdul Taib Mahmud ditu, kemari.

Ku iya, bekau ari pemutus JPBN ti ngetuka sekat jalai alun neresa pelilih menua rayat Sarawak bebas mindah tang mesti seruran ngasika Atur Pengawa Standard (SOP) kelebih agi lebuh pulai ke menua pesisir.

“Kebuah pia, laban mayuh kes berampit di menua pesisir datai ari mengeri.

“Nya alai, anang betabi jari lebuh datai ba menua taja pan nya pekara ti suah digaga suba, tang diatu pengawa nya nyangka deka ngeruga nyawa kitai,” ku iya.

Berebak enggau nya, ngelansa pasal Tun Taib, Uggah madahka mayuh pemansang di Sarawak udah diberi Tun Taib kenyau iya tama dalam politik ba taun 1963.

“Iya udah nyadi kepala menteri kitai ari taun 1981 nyentuk 2014 lalu udah nyadi tuai ti dinamik ngemeratka rayat.

“Tun Taib mega mayuh udah ngambi bagi dalam ngenegapka penyerakup bansa enggau pengelikun entara pupu bansa nuju politik ti tegap,” ku iya.

Rambau program nya pengawa besembiang mega bisi dibacha Bishop Besai Dr Simon Poh ngarika pengarap Kristian, Gurdial Singah (Sikh), Venerable Bhikkhuni Dhammika (Budha), Ho Ho Boon (Tao), Prabu Kripa Sindu Krishna (Hindu) enggau Chin Chia Chau (Baha’i).

Sama bisi datai Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Sekretari Perintah Nengeri Datuk Amar Jaul Samion, Menteri Muda Elektrik Menua Pesisir Datuk Liwan Lagang, Menteri Muda ba Opis Kepala Menteri (Undang-Undang enggau Adat Bumiputera).

Datuk John Sikie Tayai, Menteri Muda Kaunsil Kandang Menua enggau Pengawa Berumah Datuk Dr Penguang Manggil, Sapit Speaker Dun Sarawak Datuk Gerawat Gala, Sapit Sekretari Perintah Nengeri (Transformasyen Menua Pesisir) Datuk Ik Pahon Joyik.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak