Seni alus bekualiti dunya ari Tanah Kenyalang

KUCHING: Sarawak endang chukup tebilang enggau pengelandik sida nempa seni halus bekualiti dunya.

Menteri Besai Datuk Seri Ismail Sabri madahka diri temegah ati nerima tepa ke chukup berega ari Tanah Kenyalang nya.

Iya nerima tepa nya lebuh nerima penemuai basa ari Kaban Parlimen Baram, Anyi Ngau enggau Kaban Parlimen Hulu Rajang, Datuk Wilson Ugak Kumbong.

“Chukup gaga nerima penatai seduai laban kelimpah berandauka mayuh macham pekara, seduai bela meri aku tepa chukup berega nyadika kenang udah nemuai kitu.

“Seduai udah meri aku sebidang tikai ke dianyam raban bansa Penan enggau sepasang Baju Burung Pua Kumbu ke mega pekayan asal raban bansa Iban.

“Chukup manah sereta alus keranjai jari menyadi kitai ari Sarawak tu lalu aku mega gaga nerima tepa tu,” ku Ismail Sabri ba sebengkah penerang di laman Facebook iya, tadi.

Iya madah baru, rayat di Sarawak endang dikelala dataika ba tikas dunya laban ngembuan bemacham pengelandik baka betenun, ngebat, beranyam enggau ke bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak