Sistem myKendiri inisiatif mantu ngemanah servis JKM

KUCHING: Sistem Pansik Digital Pemenggi Palan Pengibun (myKendiri) siti ari inisiatif Opis Menteri Pemansang Orang Indu, Ruang Bilik enggau Mensia Mayuh (KPWKM) dikena ngemuntangka enggau mantu palan pengibun ti udah bisi ba serata menua.

Menteri iya Datuk Seri Rina Mohd Harun madahka, di Malaysia bisi 1,000 buah palan pengibun ti berejister enggau Opis Pengintu Pendiau Mensia Mayuh (JKM).

“Sebedau tu, pansik (perati) digaga nengah chara manual laban palan pengintu tu mesti nganjung ripot ngagai JKM.

“Nya alai, kitai deka ngemuntangka ari sukut patau awakka sida ulih nitihka pengabis nadai atur minimum ti udah ditetapka maya beoperasyen,” ku iya.

Iya bejaku munyi nya ba aum media pengudah bejadika myKendiri di Palan Autism Kuching (KAA) ditu, kemari.

Ku iya, lebuh myKendiri tu udah dipejalaika pekara nya deka meri pemanah ngagai opis menteri enggau JKM sereta ngemuntangka raban pengatur palan pengintu nya empu.

“Tu sebuah sistem bepelasarka web dikena nyaut kangau nuju guna digital.

“Nyema sebedau tu mayuh tanya digaga, tang ari sistem tu kitai ngurangka 80 tanya ngagai 35 tanya aja.

“Tu ngemuntangka kededua piak ungkup ngaga patau enggau pekara bukai,” ku iya.

Iya nandu, madahka opis menteri mega deka ngurangka risiko palan pengintu ti nadai berejister.

“Kitai udah mantu sida ungkup ngemuntangka semua pekara.

“Kitai mega ngerunding ukai semina raban pengatur tang ngagai sida ti ngulihka pemaik ari palan pengintu tu.

“Nya kebuah, tanggungpengawa mensia mayuh enggau raban tuai mega beguna dikena madahka ngagai JKM enti bisi palan pengintu ti bedau direjister,” ku iya.

Iya madahka, opis menteri sida ngembuan 108 JKM di serata pelilih menua ulih endur madah pasal palan pengintu ti bedau direjister.

“Udah direjister baru kitai ulih ngaga patau enggau nentuka pengatur palan pengintu nitihka atur ti udah ditetapka kami.

“Kami ngarapka, lebuh ngeletak atur tu ukai dikena ngenusah sida tang dikena mantu awakka sida ulih bejalaika palan pengintu enggau lebih manah.

“Atur ti digaga ungkup ngemuntangka enggau nyeliahka pekara ti dikeenggai kitai ba maya ti deka datai,” ku iya.

Sama bisi datai Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah enggau ke bukai.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak