Skim Pengawa Berumah Semaring deka ditangkir

KUCHING: Skim Pengawa Berumah Semariang deka ditangkir ungkup ngaga projek rumah baru nebing sungai semak sekula nyentuk ke Sungai Salak.

Kepala Menteri Datuk Patinggi Abang Johari Tun Openg madahka iya udah minta JTS nyukat tanah dia ungkup projek rumah sebaka enggau projek rumah di Sungai Bedaun.

“Di Sungai Bedaun, dalam sebuah rumah sida bisi anak enggau menantu ti begulai sebilik, sida tu ti diberi projek rumah ba Sungai Bedaun.

“Aku deka meri agih belanja ngagai JTS ungkup muka tanah awakka sida ngatur manah sereta nimbuk tanah dulu laban palan nya di tebing sungai, enti enda ditimbuk palan nya deka ampuh,” ku iya.

Abang Johari bejaku munyi nyerumba Program Nyuaka Surat Geran Tanah Seksyen 18 Kanun Tanah Nengeri di Balai Mensia Mayuh Kampung Samariang Batu ditu, kemari.

Ku iya, pengawa nya agi dalam perambu lalu deka dipejalaika berengkah taun baru ba baruh Langgur Pemansang Malaysia Lumpar Ke-12 (RMK12).

Kelimpah ari nya, iya madahka ungkus nimbuk tanah enggau pasir ba palan nya ila deka ditanggung Perintah Sarawak.

“Semua ungkus nimbuk tanah deka ditanggung Perintah Sarawak, udah nya kitai meri lot tanah awakka sida ulih ngaga rumah ba tanah nya.

“Maya ngaga rumah nya, sida deka diberi dua iti chara iya nya sida deka Perintah Sarawak ngaga rumah tauka sida empu ngaga rumah kediri,” ku iya.

Iya nangkan ke nya, ngelalau ngambika peranak menua ti deka nemu pasal tanah awakka ngusung JTS.

“Kitai bisi undang-undang pasal tanah nyema kita bisi deka betanya baikka tanah nya tanah perintah tauka ukai kita patut ngusung JTS.

“Aku kasih meda kes di Semerah Padi, udah 40 taun diau dia bisi ibu ari Simunjan kena tipu orang datai kia madahka tanah nya sida ngempu lalu ngasuh iya mayar tanah nya.

“Udah nya, ibu nya disuruh mayar duit beribu-ribu tang sida enda nemu tanah nya ukai tanah iya laban kebendar nya tanah perintah, mayuh kes baka tu nyadi,” ku iya.

Nya alai, iya sekali agi ngelalau rayat ti datai ke Kuching ngambika bejejaga tauka nanya JTS dulu sebedau meli tanah orang laban menua tu bisi undang-undang.

Program Nyuaka Surat Geran Tanah Seksyen 18 Kanun Tanah Nengeri kemari ngemataka 83 iku penerima ari Kampung Samariang Batu, Samariang Pinggir, Samariang Batu Teruntum, Samariang Tanah Merah enggau Samariang Wawasan Jaya udah nerima surat geran tanah.

Surat geran tanah tu diberi nambahka 566 surat geran tanah bukai ti udah diberi ngagai peranak di Samariang kenyau taun 2015 suba.

Sama bisi datai Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) ti mega Adun Samariang Datuk Sharifah Hasidah Sayeed Aman Ghazali, Sekretari Mendam Opis Menteri Pemansang Mengeri enggau Pengeraja Asal Datuk Sr Zaidi Mahdi, Sapit Direktor Pengatur JTS Sarawak Awang Zamhari Awang Mahmood, Datuk Bandar Kuching Utara Datuk Junaidi Reduan enggau ke bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak