Tanah agi mengkang dalam bilik bekau ari penusah bah

KUCHING: Taja udah lima bulan pengudah bah besai nyadi ba bulan June enggau Julai tu tadi tang tiga buah rumah panjai raban bansa Penan agi bisi teda tanah bai ai bah dalam bilik.

Tiga buah rumah panjai ke napi penusah baka nya ketegal bah besai tu iya nya Long Anyat, Long Daloh Bestari enggau Long Luteng.

Kebuah pia laban lutak ketetiga rumah panjai ke ngembuan 162 pintu nya enda ulih dibasu ketegal ai nadai agi dikena muai tanah nya.

Ku Pemungkal Hope Place, Kelvin Wan, sida sedarka pekara nya lebuh ngabas ketetiga rumah panjai nya apin lama ke udah.

“Kami udah ngabas tiga buah rumah panjai nya lalu lalu meda rumah sida agi ngundan tanah taja udah beberapa bulan napi penusah bah besai.

SAUP KAMI… Siku indu ari Long Daloh Bestari nunjukka tikas ai bah ti nuntung rumah panjai sida ngagai Kelvin.

“Rumah panjai di Long Daloh Bestari pemadu balat lebuh setengah ari rumah panjai nya penuh enggau lutak sereta kamah endar.

“Udah nya, kami sedarka peranak ba tiga buah rumah panjai nya nadai disikap ai beresi lalu bepanggai naggai ai sungai semak rumah panjai nya taja udah disikap bekal kuasa karan ngena solar disediaka Sarawak Energy Berhad (SEB),” terang iya.

Ngelansa silik, iya madah, kelimpah ari rumah panjai nya penuh enggau tanah, reta tengkira enggau bekal pemakai sida mega abis rusak.

Pia mega, Kelvin madah pekara ti narit ati sida nya Sekula Primari (SK) Long Luteng, sebuah sekula primari ungkup bala nembiak ari tiga buah genturung pendiau.

Ku iya, sekula nya diatu ngembuan urung 300 iku nembiak ke tebal agi ari raban bansa Penan sereta bansa Iban, Kenyah enggau Kayan.

“Bisi sekeda nembiak nurun ke sekula ngena bot tang pekara ke balat sinu nya sida enda ulih nurun ke sekula minggu nyin tadi laban jematan ngelawa sekula nya rusak,” terang iya.

Berebak enggau nya, Kelvin minta mensia mayuh sama nyaup peranak di Long Bedian nya.

Ku iya, entara bantu diguna baka berau, minyak makai, kuie, garam, gula, mi, Milo, sengkabung mua ungkup orang besai tuai enggau anak mit sereta penuchi jari.

Nangkan nya ku iya, kereban tulis mega diguna ngambi diberi ngagai nembiak SK Long Luteng.

Nya alai ku iya, barang sapa ke bisi entukar 4WD enggau deka nyereta konvoi ngagihka bantu ngagai peranak nya tau telefon ngagai Kelab 4X4 Bintulu ba lumur, 019-8243876.

Mensia mayuh ke bisi tanya bukai tauka penerang silik pasal pekara tu tau telefon ngagai Hope Place ba lumur, 082-505987.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak