Tanah ungkup projek pemansang tetap dipampas

KUCHING: Perintah ngambi tanah rayat dikena bejalaika projek pemansang infrastruktur enggau utiliti nyengkaum nyendiaka fasiliti ke meruan agi ungkup pengelantang rayat.

Sapit Kepala Menteri, Datuk Amar Awang Tengah Ali Hasan madah, inisiatif tu deka nambahka buah pemansang di menua ulu enggau menua pesisir ungkup pemaik enggau pengelantang rayat.

“Baka ke dipeda kitai diatu, bemacham projek pemansang infrastruktur enggau utilti udah dikemendar enggau benung dipejalai Perintah Sarawak.

“Tu nyengkaum ngemanah jalai tebing tasik, Projek Jalai Besai Kedua, ngaga jematan, loji ai beresi, stesyen kuasa karan, tiang pemanchar enggau ke buka.

“Nya kebuah, Kepala Menteri Datuk Patinggi Abang Johari Tun Openg semampai berundingka chara nambahka penatai pemisi tambah dikena nyapai tuju sereta nambahka buah pemansang ngambi nyendiaka perengka guna ke meruan agi kelebih agi ba menua pesisir,” terang Awang Tengah.

Teks jaku Awang Tengah nya dibacha Menteri Muda Pemansang Dagang Entarabansa enggau Industri, Terminal industri enggau Pemansang Pedagang, Datuk Mohd Naroden Majais ba Pengawa Nyuaka Chek Pampas Tanah Projek Loji Ai Aras Tinggi Matang enggau Pengawa Masang Paip Bagu Menua Kuching, kemari.

Ku Awang Tengah ke mega Menteri Pemansang Mengeri enggau Pengeraja Asal II, tanah ke diambi nya nyengkaum tanah ke bisi pengempu tauka nitihka tagih tanah Adat Bansa Asal (NCR).

“Perintah enda ngambi tanah pechuma tang tanah nya diambi nitihka pekara dalam Kanun Tanah Negeri (Bab 81) dan Perkara 13 Perlembagaan Persekutuan.

“Ke alai nadai siku pen ulih diambi reta kelimpah ari nitihka atur undang-undang enggau nadai undang-undang ulih netapka reta sida diambi enggau sepeneka sereta nadai pampas ke patut.

“Nya kebuah, semua tanah ti diambi deka dibayar pampas nitihka perati Opis Tanah enggau Survei (JTS) Sarawak enggau penyampau pampas dibayar baka nitihka utai tanam, pemesai tanah nitihka rega diatu enggau struktur projek digaga dia,” ku iya nerang.

Ngelansa pasal pengawa nyuaka chek pampas tanah nya, Awang tengah madah, 32 chek udah disua ngagai 24 penerima penyampau RM24.6 juta dikena bejalaika projek loji ai aras tinggi di Matang enggau pengawa masang paip.

“Projek tu nyengkaum ngaga enggau nembuka loki ai (aras sederhana) pemesai 100 ml, loji ai (aras tinggi) kedua pemesai semilan ml, ngemanah stesyen pam ai di Loji Ai Beresi Matang enggau Batu Kitang, sistem paip sereta projek bukai.

“Projek tu udah diperambu enggau manah dikena nangkup peminta bekal ai ke majak nambah ditu kelebih agi di Santubong, Buntal, Bandar Baru Semariang, Petra Jaya, Kampung Rampangi, Pasir Pandak, Demak Laut, Kampung Bako, Muara Tebas enggau Palan Penyangkai Kapal Senari,” terang iya baru.

Nambahka nya ku iya, projek nya disadang deka nyungkak tikas ekonomi rama komuniti ditu sereta nyamin pengidup peranak ditu.

“Projek nya mega sebagi ari Program Grid Bekal Ai Sarawak dikena mutarka isu bekal ai enggau meruan agi manggai taun 2025.

“Projek baka tu nyata deka meri pemaik ngagai rayat sereta nunjukka semua pekara ti udah diperambu Perintah Sarawak endang dipejalai ungkup pengelantang rayat,” ku Awang Tengah nyemetak madah.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak