Ubah RUU ba reti Bumiputera ngambika adil ngagai semua

BARAM: Pengawa deka ngubah Rang Undang-Undang (RUU) pasal reti jaku ‘Bumiputera’ Sarawak diatur ngambika sama bela adil ngagai semua peranak menua.

Kepala Menteri Datuk Patinggi Abang Johari Tun Openg madahka jeman diatu rayat menua Sarawak mayuh udah jadi melaki bini enggau bansa bukai.

“Bisi bansa Kayan jadi enggau bansa Melayu, bansa Melayu jadi enggau bansa China, Bidayuh enggau ke bukai.

“Nya alai, anak sida iya nyadi penakan, tu meh ti ngasuh menua kitai tan beserakup laban kitai enggai nyadi nganu pangan diri,” ku iya.

Abang Johari bejaku munyi nya ba Program Nasih Tanah Rumah Panjai Long Laput di baruh Skim Bantu Rumah Menua Pesisir Sarawak di Baram, tadi.

Ku iya, nya kebuah perintah deka ngubah undang-undang tu ngambika anak penakan di menua tu sama ulih ngasaika hak nyadi Bumiputera.

“Nitih undang-undang diatu enti apai enggau indai iya Bumiputera tauka kededua seduai Bumiputera baru anak nya nyadi Bumiputera.

“Tang baka ni enggau anak penakan? Nya alai kitai ngubah undang-undang asal siku ari apai tauka indai Bumiputera, anak iya ulih nyadi Bumiputera,” ku iya.

Tandu iya, pekara tu deka ngemuntangka bala anak lebuh bekaul pasal reta enggau pekara bukai.

Nangkan ke nya, iya madahka pekara nya deka diatur sereta dipansik dalam ke alai iya minta rayat terus tan beserakup awakka menua terus likun.

“Nyema nengeri kitai bepechah…baka sehari tu (kemari) kitai meda menua Sudan di Afrika pemadu kaya nengah asil minyak enggau gis, tang bisi rampas kuasa bala soldadu ngujungka menua nya diatu nadai likun.

“Kekadang aku takut meda di Semenanjung sampai tiga kali betukar Menteri Besai.

“Tang puji Tuhan, di Sarawak kitai likun lalu kitai deka terus bebendar di baruh GPS mai ulah sama bela (keadilan) ngagai semua pupu raban bansa di Sarawak,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak