Ali Biju disukung tuai PDP, PBB Krian ngetanka penuduk

SARATOK: Penyandang penuduk Dun N.39 Krian, Datuk Ali Biju nerima sukung ngetanka penuduk iya ari tuai dua parti komponen GPS Krian.

Chairman Parti Demokratik Progresif (PDP) Krian, Jeffrey Jimbun mai bala mayuh sama begempung ati nyukung Ali maya Pengawa Bepilih Nengeri Ke-12 (PRN-12) deka datai.

“YB Datuk tu meh orang ti chukup badas, bebendar gawa ke rayat ngelama tu.

“Bekau pengawa iya endang udah nyata dipeda ari suba nyentuk diatu, tuai ti chukup siru enggau mentas sereta seruran ngabas rayat,” ku iya.

Nambahka nya, Chairman Parti Pesaka Bumiputera Bersatu (PBB) Krian, Datuk Douglas Sullang ngembuan penemu ke sama enggau Jimbun.

“Aku mai bala mayuh, kitai serumah, kitai semenua enggau bala PBB Krian ditu sama meri sukung penuh ngagai YB Datuk Ali ngetanka penuduk iya.

“Kitai anang sesekali beaum juak maya nyukung YB Datuk ba pengawa Bepilih Kunsil Negeri enda lama agi. Baka Ketup Lelabi Mati!” ku iya madah nyemetak.

Sukung nya dibantai rambau pejalai Ali enggau bala iya ke Rumah Benedict Sigie, Kerupok, Sebetan di Krian ditu kemari.

Ari nya tadi, Ali empu berasai lantang ati meda sukung ari bala tuai parti enggau rayat ti meruan meri sukung ngagai pejalai politik beratka rayat.

“Politik kitai ba Krian ditu udah jauh ‘berubah’ laban tuai parti ari PDP, PBB enggau Adun ari Parti Bersatu ulih duduk berandau, begulai sama berundingka pengelantang rayat.

“Nya kebuah aku berani nyebut bisi pengelebih laban politik kitai udah jauh ke mua (advance) ari menua bukai, nadai penanggul begulai ngatur pemansang menua

“Terima kasih ke sukung seduai lalu aku madahka tu meh gaya Politik Krian ti patut nyadi chunto ba menua bukai,” tandu iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak