Linda Jantin ikon dagang JKM

KUCHING: Bepun ari bedagang semina di belakang rumah di Kampung Rapak, Sri Aman diatu udah bisi sebuah gudang kediri empu ba Kuching.

Dua taun ngaul diri dalam dagang madu kelulut, Linda Jantin pengeluar produk ti ngena Bantu Orang Dagang Mikro Pengelantang (UMK) ari Opis Pengintu Pengelantang Mensia Mayuh (JKM) ti mujur ba Sarawak.

Nangah geran beungkus RM5,000, diatu Linda mujur nyadi ikon orang dagang JKM.

Linda mega ngembuan 600 iku ejen enggau stokis di serata nengeri ungkup nyual produk bepelasarka betanam betupi ti dikemansangka iya empu.

“Pengudah nerima bantu, aku ulih ngerembaika asil produk madu kelulut nyadi produk ‘hiliran’.

“Kelimpah ari madu kelulut, aku ngerembaika produk bukai iya nya balm (minyak unsut).

“Meda peluang nya bisi, aku ngerembaika agi produk hiliran ti bebida ari orang dagang lain di luar din,” ku iya.

Diatu Linda ngembuan produk minyak angi ngena chap Abella Scent.

Ku iya, dagang iya mega kena empas ari pengerekai pandemik Covid-19 ti nyau deka dua taun nuntung menua.

Taja pia iya terus ransing agi ngagai komuniti dagang sereta terus ngiga jalai enggau nerima gaya menua ti mar neruska dagang nya.

“Aku berengkah kereja ari rumah lalu diatu aku ulih mantu orang bukai, mai sida nyadi ejen dikena nambahka penatai pemisi.

“Nya kebuah aku berasai temegah ulih mantu sida ngulihka penatai pemisi tauka ngiga duit tambah sekumbang pengerekai penyakit tu,”ku iya.

Nya alai, Linda ngarapka bantu nya terus diberi nyadika peransang ngambika iya ulih muka jalai ngagai orang bukai mujur muka dagang baka iya.

Kelimpah ari Linda, siku orang dagang ngaga dagin proses buger Zakaria Ibrahim mega bulih anguerah platinum UMK JKM asil ari sanding penemu ti diberi JKM dalam negapka peneleba bedagangka produk.

Ku iya, lebuh bisi bantu ari JKM, mayuh pemaik diulihka ari sukut sanding penemu, ngemanahka diri empu nyadi siku orang dagang enggau runding baru dalam makit diatu.

“Aku mega berengkah nengah geran RM5,000 ngepunka enggau ngemesaika dagang,” ku iya.

Zakaria ngarapka deka bisi agi bantu diberi ba maya ti deka datai ngagai raban orang dagang ngemanahka enggau nambahka pengeluar produk sida.

Ku iya, bantu nya beguna ngagai sida ti agi baru dalam dunya dagang neruska pengawa nya ngambika enda putus ba tengah jalai.

Dulu ari nya, Sapit Kepala Menteri ti mega Menteri Dagang Entarabansa enggau Industri, Terminal enggau Pemansang Orang Dagang Datuk Amar Awang Tengah Ali Hasan nyuaka anugerah ngagai raban orang dagang ti mujur di Program Ngintu Hari Begulai nuju Pengelantang Pendiau ba Palan Aum Borneo Kuching (BCCK) kena Hari Empat tu tadi.

Kenu ku Awang Tengah, bantu ti diberi perintah ngelama tu deka diteruska nyema mandat diberi baru ngagai perintah Gempung Parti Sarawak (GPS) dalam Pengawa Bepilih Besai Nengeri (PRN-12) ti deka datai.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak